Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 158 Hüküm no: 143 Orijinal metin no: [23b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hristo v. Dedo’nun borcuna karşılık Mehmed Beşe b. Abdullah’a bazı emlâkini rehin vermesi Vilâyet-i Rumeli’nde Avlonya sancağında Ergirikasrı kazâsına tâbi‘ (…) nâm karye sâkinlerinden Hristo v. Dedo nâm zimmî meclis-i şer‘-i hatîr-i lâzımü’t-tevkīrde işbu râfi‘ü hâze’l-kitâb Mehmed Beşe b. Abdullah nâm râcil mahzarında bi’t-tav‘ ve’r-rızâ ikrâr ve takrîr-i kelâm edip mezbûr Mehmed Beşe yedinden bi tarîki’l-karzi’ş-şer‘î yirmi bin nakd-i fıddî-i Osmânî râyic fi’l-vakt akçe ahz ve kabz edip mukābele-i meblağ-ı mezbûrda karye-i merkūmede vâki‘ silk-i mülk-i sahîhimde münselik ve münharıt bir tarafdan Deriçe v. Koma mülküne ve bir tarafdan Vaneko v. ( ) mülküne ve bir tarafdan arz-ı hâliyeye ve bir tarafdan tarîk-i âma müntehî mülk menzilimi ve menzil-i mezbûra muttasıl ve mülâsık tahmînen altı çapalık bir kıt‘a mülk bağımı ve yine karye-i merkūme kurbunda lede’l-ahâlî ve’l-cîrân bir kıt‘a mülk harman yerimi mezbûr Mehmed Beşe yedinde rehin vaz‘ eyledim dedikde mukırr-ı mezbûrun vech-i meşrûh üzre cârî olan ikrâr ve takrîrin el-mukarru lehü’l-mezbûr Mehmed Beş bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis aşer min târihi’l-mezbûr. Şuhûdü’l-hâl: Mehmed Bey b. Ali el-Cündî Ali Bey b. Sinan Çavuş, Mustafa b. Mehmed, Ali b. Abdullah, Süleyman b. Turgud, Yorgo v. Papa Kiro, Niko v. Şoli, Deriçe v. Kiro, Köko v. Deriçe ve gayruhüm mine’l-hâzırîn.