Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 159 Hüküm no: 144 Orijinal metin no: [23b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hâtun bt. Gazanfer’in menzil satışından dolayı Mehmed Bey b. Hüseyin’de alacağının kalmaması Medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Evlice Baba mahallesi sâkinelerinden fahrü’l-muhadderât ve zahrü’l-muvakkarât Ayşe Hâtun bt. Gazanfer meclis-i şer‘-i hatîr-i lâzımü’t-tevkīrde işbu hâfız-ı hâze’l-kitâb fahrü’l-eşbâh Mehmed Bey b. Hüseyin nâm cündî mahzarında bi’t-tav‘ ve’r-rızâ ikrâr ve takrîr-i kelâm edip işbu akdin sudûruna değin silk-i mülk-i sahîhimde münselik ve münharıt olup mahalle-i merkūmede vâki‘ bir tarafdan Bayram b. Ferhad mülküne ve bir tarafdan Kâmile bt. Müezzin Şaban mülküne ve bir tarafdan Emine bt. Abdullah mülküne ve bir tarafdan tarîk-i âma müntehî iki tahtânî beyti ve sofayı ve bir tahtânî odayı ve bir su kuyusu ve bir tarafdan kileri ve zât-ı eşcâr-ı müsmire ve gayr-ı müsmireyi hâvî cüneyneyi müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile bundan akdem mezbûr Mehmed Bey’e bey‘-i bât tarîki üzre otuz bin nakd-i fıddî-i Osmânî râyic fi’l-vakt akçeye akd-i bey‘ edip yirmi beş bin nakd-i mezbûrü’n-na‘t akçesini hîn-i akidde merkūm Mehmed Bey yedinden ahz ve kabz eyleyip mezbûr Mehmed Bey zimmetinde beş bin nakid akçe bâkī kalmışdı hâlâ meblağ-ı bâkī olan beş bin akçeyi dahi mezbûr Mehmed Bey yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân menzil-i mahdûd mezkûr Mehmed Bey’in mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırra-i mezbûrenin vech-i mübeyyen üzre cârî olan ikrâr ve takrîrini el-mukarru lehü’l-mezbûr Mehmed Bey bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sânî aşer min Rebî‘ilâhir li sene tis‘a ve ışrîn ve elf. Şuhûdü’l-hâl: Bayram Efendi b. Şükrullah, Mahmud Çelebi b. Mehmed el-İmâm bi’l-mahalleti’l-mezbûre, Hasan b. Abdullah el-Müezzin, Hüseyin Dede b. Hüseyin Türbedâr-ı Hazret-i Ebâ Eyyûb el-Ensârî, Hüseyin Çelebi eş-şehîr bi Solakzâde, Mehmed Bey b. Ali el-Cündî Ali b. Abdullah, Hasan Bey b. Abdullah el-Cündî Süleyman Bey b. Abdullah el-Cündî Şaban b. Hüseyin, Mehmed Bey b. Ali el-Cündî Derviş Çelebi b. Hasan, Ali b. Ahmed, Hüseyin Çelebi b. Hasan, Mehmed Çelebi b. Hüseyin, Mustafa b. Mehmed, Ali Ağa b. Abdülmennân, Yakub b. Kurd, Abdurrahman b. Musa, Haydar Bey b. Hüdâverdi er-Râcil, Ali b. Abdullah, Süleyman b. Turgud, Ali b. Hasan, Muharrirü’l-hurûf Mehmed Efendi b. Esedüddin el-Mülâzım.