Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 162 Hüküm no: 149 Orijinal metin no: [24a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstemad v. Kini’nin menzilini Niko v. İstati’ye satması Vilâyet-i Rumeli’nde Ergirikasrı kazâsına tâbi‘ Piskopi nâm karye sâkinlerinden İstemad v. Kini nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Niko v. İstati nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Yorgo v. İstati mülküne ve bir tarafdan Zope v. Didi mülküne ve bir tarafdan Zope v. Nika mülküne ve bir tarafdan arz-ı hâliyeye müntehî ve mahdûd iki tahtânî beyti ve bir harman yerini ve bir samanlığı ve eşcâr-ı müsmire ve gayr-ı müsmireyi hâvî cüneyneyi müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Niko’ya altı bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen-i ma‘dûd eylediğimden sonra mebî‘-i mahdûdu mahallinde kabza müşterî-i merkūmu taslît eyledim ba‘de’l-yevm sâlifü’l-beyân menzil-i mahdûd merkūm Niko’nun mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-mezbûr Niko bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ aşer min Rebî‘ilâhir li târihi’l-mezbûr. Şuhûdü’l-hâl: Osman Çavuş b. Sinan Çavuş, Hüseyin Çelebi b. Sinan Çavuş, Mustafa b. Mehmed, Yakub b. Kurd, Todori v. Kini, Nika v. Kini, İstanyo v. İstako, Kiro v. Yani, Dimo v. Kiro.