Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 163 Hüküm no: 150 Orijinal metin no: [24b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Bey b. Abdullah’ın menzilini Emine bt. Sefer’e satması Medîne-i Kostantıniyye -humiyet ani’l-âfât ve’l-beliyye- mahallâtından Tülbentçi mahallesi sükkânından İbrahim Bey b. Abdullah nâm kimesne meclis-i şer‘-i hatîr-i lâzımü’t-tevkīrde işbu hâmiletü hâze’l-kitâb Emine Hâtun bt. Sefer tarafından husûs-ı âti’l-beyânı tasdîka vekîl olup vekâleti bimâ hüve nehci’l-mu‘teberi’ş-şer‘î şer‘an sâbite olan zevci Mehmed Bey b. Ferhad mahzarında bi’t-tav‘ ve’r-rızâ ikrâr ve takrîr-i kelâm edip medîne-i Hazret-i Ebâ Eyyûb-i Ensârî -râdiye anhu Rabbühü’l-Bârî- mahallâtından Zeyneb Hâtun mahallesinde vâki‘ bir tarafdan Hasan Bey b. Abdullah mülküne ve bir tarafdan İbrahim Efendi b. ( ) mülküne ve bir tarafdan Ahmed b. Himmet el-haccâr mülküne müntehî iki tahtânî beyti ve bi’r-i mâyı ve eşcâr-ı müsmire ve gayr-ı müsmireyi hâvî cüneyneyi müştemil olup işbu akdin sudûruna değin silk-i mülk-i sahîhimde münselik ve münharıt olan mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile müvekkile-i merkūme Emine Hâtun’a on üç bin fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm menzil-i mahdûd müvekkile-i merkūme Emine Hâtun’un mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıfe olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Mehmed Bey bi’l-vekâle tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-ışrîn min Rebî‘ilâhir li târihi’l-mezbûr. Şuhûdü’l-hâl: İbrahim Bey b. Abdullah el-Bevvâbü’s-sultânî, Veli Dede b. Ferhad, Murad b. Abdullah, el-Hâc Mustafa b. Abdullah, Osman b. Abdullah, Mustafa b. Mehmed, Yakub b. Kurd, Süleyman b. Turgud ve gayruhüm.