Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 163 Hüküm no: 151 Orijinal metin no: [24b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zeyni bt. Kemal’in menzilin üçte bir hissesini Paroh v. İlyas’a satması Medîne-i Ebâ Eyyûb-i Ensârî -râdiye anhu Rabbühü’l-Bârî- tevâbi‘inden nefs-i Hasköy sâkinelerinden Zeyni bt. Kemal nâm nasrâniye meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Paroh v. İlyas nâm yahudi mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ iki tarafdan Yakob v. Serahi nâm yahudi mülküne ve bir tarafdan Dimitraki v. Hina mülküne ve bir tarafdan tarîk-i âma müntehî ve mahdûd olup bir fevkānî ve üç tahtânî beyti ve sundurmayı ve matbahı ve şadırvanı ve bahçeyi ve üç su kuyusunu ve üç kenîfi müştemil olan mülk menzilden sülüs hisse-i şâyi‘amı mezbûr Paroh’a elli bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd kıldım ba‘de’l-yevm sâlifü’l-beyân mülk menzilden sülüs hisse-i şâyi‘a mezbûr Paroh’un mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırra-i mezbûrenin minvâl-i muharrer üzre cârî olan ikrâr ve takrîrin el-mukarru lehü’l-mezbûr Paroh bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sânî ve’l-ışrîn min Rebî‘ilâhir li sene tis‘a ve ışrîn ba‘de’l-elf. Şuhûdü’l-hâl: Mahmud Ağa b. Mehmed, Osman Bey b. Mustafa es-Sarrâcü’s-sultânî, el-Hâc Mehmed b. Abdullah, Mehmed b. el-Hâc Mustafa, Abbas Halîfe b. Yusuf, Hüseyin Bey b. Mahmud es-Saracü’s-sultânî, Mehmed b. el-Hâc Mustafa, Şeban v. Avraham, Şemayel v. Yasef, Avraham v. Yasef, gayruhüm.