Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 164 Hüküm no: 153 Orijinal metin no: [24b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kâtib Kevser Hüseyin Efendi Vakfı’na ait menzilin oturma hakkının Receb Halîfe b. Ebûbekir’e devredilmesi Merhûm ve mağfûrun-leh Kâtib Köse? Hüseyin Efendi b. Abdullah vakıf ve tesbîl edip süknâsı evlâdı eş-Şeyh Ferâhî Efendi demekle ma‘rûf merhûm Mustafa Efendi b. el-merhûm Bâli Efendi’ye ba‘dehû süknâsı mahallinde olan sulehâya şart eylediği Havâss-ı Kostantıniyye mahallâtından merhûm Baba Haydar mahallesinde vâki‘ vakıf menzilde sâkin olan Hasan Efendi b. Nasuh nâm kimesne menzil-i merkūmun hakk-ı süknâsını işbu hâfız-ı hâze’l-kitâb fahrü’s-sulehâ Receb Halîfe b. Ebûbekir nâm kimesneye hüsn-i ihtiyârıyla ferâğ eylemeğin menzil-i merkūm-ı mevkūfun hakk-ı süknâsı mezbûra tevcîh olunup işbu hurûf ber sebîli’t-temessük ketb olundu. Hurrire fi’l-yevmi’r-râbi‘ ve’l-ışrîn min Rebî‘ilâhir li sene tis‘a ve ışrîn ve elf. Şuhûdü’l-hâl: Ahmed Halîfe b. Mehmed, Mehmed b. Hasan, Mustafa b. Mehmed, Yusuf b. Abdullah, Ali b. Abdullah, Süleyman b. Turgud.