Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 165 Hüküm no: 154 Orijinal metin no: [25a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Marola bt. Dimitri’nin kocası Kosta v. Mihal’in mirası hususunda Aleksandra bt. Andriye aleyhine açtığı davada iddiasını ispat edemeden firar eylemesi Havâss-ı Aliyye kazâsı müzâfâtından nâhiye-i Çatalca mahallâtından Büyükmahalle sâkinelerinden Marola bt. Dimitri nâm [nasrâniye] meclis-i şer‘-i hatîr-i lâzımü’t-tevkīrde yine mahalle-i mezbûre sâkinelerinden Aleksandra bt. Andriye nâm nasrâniye tarafından husûs-ı âti’l-beyâna vekîl olup vekâleti hasm-ı şer‘î-i câhid mahzarında Yusuf Beşe b. Abdullah er-Râcil ve Yorgi v. Yani nâm kimesneler şehâdetleri ile şer‘an sâbite olup mezbûre Aleksandra hâlâ zevci olan Dimitri v. Yani nâm zimmî muvâcehesinde takrîr-i da‘vâ edip mezbûre Aleksandra’nın bundan akdem zevci olup hâlik olan Kosta v. Mihal nâm zimmî benim ammim oğlu olup ba‘de helâkihî bana ve li ebeveyn kız karındaşım İstemade nâm nasrâniyeye ve zevce-i metrûkesi merkūm Aleksandra[’ya] münhasıra iken mezbûre Aleksandra hâlik-i mezbûrun cümle muhallefâtından mahalle-i mezbûrede vâki‘ bir tarafdan Yani v. ( ) mülküne ve bir tarafdan kiliseye ve iki tarafdan tarîk-i âma müntehî ve mahdûd iki ocaklı iki fevkānî beyti müştemil mülk menzilini ve yine menzil-i mezbûra muttasıl ve mülâsık bir tarafdan Sarı Yorgi mülküne ve bir tarafdan Yani v. ( ) mülküne ve bir tarafdan Zafire bt. ( ) nâm nasrâniye mülküne ve bir tarafdan tarîk-i âma müntehî zât-ı eşcâr-ı müsmire ve gayr-ı müsmireyi hâvî bahçesini ve Piskopos deresinde vâki‘ lede’l-ahâlî ve’l-cîrân tahmînen altı dönüm bir kıt‘a mülk bağını hilâf-ı şer‘-i şerîf vâzı‘atü’l-yed olup benim hisse-i şer‘iyye-i mevrûsemi zabt ve tasarrufuma mâni‘a olur suâl olunup bi hasebi’ş-şer‘i’ş-şerîf ihkāk-ı hak olunmak olunması matlûbumdur dedikde gıbbe’s-suâl mezbûr Dimitri cevâbında bi’l-vekâle fi’l-hakīka zikr olunan emlâk mürd-i mezbûr Kosta’nın mülkleri olup kable helâkihî sene selâse ve ışrîn ve elf Recebi evâsıtında müvekkile-i merkūme Aleksandra’ya on altı bin dört yüz akçe deyni mukābelesinde bey‘ edip semeni deynine takās eylemişdir ba‘de helâkihî vârislerine intikāl eylememişdir deyû târih-i mezbûrda nâibü’ş-şer‘ olan Şaban Efendi imzâsıyla mümzâ ve hatmi ile mahtûm hüccet-i şer‘iyye ibrâz edip nazar olundukda vekîl-i mezbûrun takrîrine mutâbık bulunup mazmûn-ı hüccet-i şer‘iyyeyi merkūme Marola bi’l-külliyye inkâr edicek vekîl-i merkūmdan mazmûn-ı hüccete beyyine taleb olundukda zeyl-i hüccetde esâmîsi mastûre olan şuhûddan Yusuf Beşe li ecli’ş-şehâde meclis-i şer‘a hâzır olup minvâl-i muharrer üzre şehâdet ettikden sonra vekîl-i mezbûr dahi şâhid-i âhar getirmek sadedinde iken müdde‘iye-i merkūme Marola firâr eylediği ecilden mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Süleyman b. Turgud, Ömer b. Bâli, Mustafa b. Mehmed, Ali b. Abdullah, Perviz b. Abdullah, İstemad v. Kolko, Yorgi v. Yani, Andriye v. Parsani.