Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 166 Hüküm no: 155 Orijinal metin no: [25a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâime Hâtun bt. Mehmed’in menzilini Mehmed Dede b. Abdi’ye satması Mahmiye-i Kostantıniyye -humiyet ani’l-âfât ve’l-beliyye- mahallâtından Şeyh Vefâ Sultan mahallesi sâkinelerinden fahrü’l-muhadderât Sâime Hâtun bt. Mehmed tarafından husûs-ı câ’i’l-beyânı bey‘ ve kabz-ı semene vekîl olup vekâleti hasm-ı şer‘î-i câhid mahzarında bimâ hüve nehci’l-mu‘teberi’l-mer‘î sâbite ve mütehakkika olan İbrahim Çelebi b. Mustafa nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Mehmed Dede b. Abdi nâm kimesne mahzarında bi’l-vekâle ikrâr ve takrîr-i kelâm edip işbu akdin sudûruna değin müvekkile-i mezbûre Sâime’nin silk-i mülk-i sahîhinde münselik olup medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Câmi‘-i Kebîr mahallesinde vâki‘ bir tarafdan İslâm Bey vakfı’na ve bir tarafdan Abdi Çelebi vakfı’na ve bir tarafdan tarîk-i hâssa ve bir tarafdan tarîk-i âma müntehî iki tahtânî beyti ve ahırı ve bir su kuyusunu ve zât-ı eşcâr-ı müsmire ve gayr-ı müsmireyi hâvî mülk menzilini cümle-i tevâbi‘ ve levâhıkı ve kâffe-i menâfi‘ ve merâfıkı ile merkūm Mehmed Dede’ye on bin iki yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd kıldım ba‘de’l-yevm sâlifü’l-beyân menzil-i mahdûd mezkûr Mehmed Dede’nin mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun vech-i meşrûh üzre bi’l-vekâle cârî olan ikrâr ve takrîrin el-mukarru lehü’l-merkūm Mehmed Dede vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ aşer min Rebî‘ilâhir li sene tis‘a ve ışrîn ve elf. Şuhûdü’l-hâl: Mahmud Çelebi b. Mehmed el-İmâm, Ömer Çelebi b. Abdülkādir el-İmâm, İbrahim b. Mehmed, Mahmud b. Sefer, İbrahim b. Abdullah, Mustafa b. Mehmed, Ali b. Abdullah, Mustafa b. Ali, Mustafa b. Mehmed, Murad b. Abdullah, Fazlullah Halîfe el-İmâm ve gayruhüm.