Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 168 Hüküm no: 157 Orijinal metin no: [26a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Hızır’ın bazı emlâk, hayvan ve ağaçlarını Mehmed Beşe b. Abdullah’a satması Vilâyet-i Rumeli’nde Avlonya sancağında Arnavud Belgradı kazâsına tâbi‘ Rumas nâm karyeden Hüseyin b. Hızır nâm kimesne meclis-i şer‘-i hatîr-i lâzımü’t-tevkīrde işbu hâfızü’l-kitâb hâssa bostancıyân zümresinden Mehmed Beşe b. Abdullah nâm acemî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Yusuf b. Ali mülküne ve bir tarafdan Mustafa b. Seydî mülküne ve bir tarafdan Hüseyin b. Bayezid mülküne ve bir tarafdan tarîk-i âma müntehî iki beyti ve zât-ı eşcâr-ı müsmire ve gayr-ı müsmireyi hâvî muhavvatayı müştemil mülk menzilimi ve menzil-i mezbûra karîb lede’l-ahâlî ma‘lûmü’l-hudûd mülk harman yerimi ve bir çift kara sığır öküzünü ve karye-i merkūme kurbunda Gübrelik’den ve Mustafa b. Seydî nâm kimesneden iştirâ eylediğim zeytin eşcârlarını ve Mustafa nâm kimesneden iştirâ eylediğim zeytin eşcârlarını ve yine benim havlum içinde olan zeytin eşcârlarımı ve Yusuf [b.] Ali’nin bahçesinde ve harman yerinde olan zeytin eşcârlarını ve bi’l-cümle taht-ı tasarrufumda olan yüz dip zeytin eşcârlarını ve yine karye-i merkūme bağları dâhilinde vâki‘ tahmînen yedi çapalık lede’l-ahâlî ve’l-cîrân ma‘lûmü’l-hudûd iki kıt‘a mülk bağlarımı ve yine karye-i merkūmede vâki‘ inde’l-ahâlî ve’l-cîrân bir kıt‘a mülk çayırı, cümle-i tevâbi‘ ve levâhıkı ve kâffe-i menâfi‘ ve merâfıkı ile bi safkatin vâhidetin mezbûr Mehmed Beşe’ye on bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip zikr olunan mebî‘leri mahallinde kabza müşterî-i merkūmu taslît eylediğimden sonra yine karye-i merkūme sınırında vâki‘ diyârımız ta‘bîriyle tahmînen iki çiftlik mutasarrıf olduğum tarlaların hakk-ı tasarruflarını sâhib-i arz ma‘rifetiyle mezbûra tefvîz edip mukābele-i tefvîzde mezbûr Mehmed Beşe yedinden altı bin nakd-i mezbûrü’n-na‘t akçeyi bi’t-tamâm ve’l-kemâl ahz ve kabz eyledim dedikde mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ ve’l-ışrîn min Rebî‘ilâhir li târihi’l-mezbûr. Şuhûdü’l-hâl: Oruc Beşe b. Ali el-Bostancı, Ali b. Mehmed Bostancı, Mehmed b. Abdullah, Mehmed b. Mehmed Bostancı, Hüseyin b. Ahmed, Hasan b. Mustafa, Mustafa b. Mehmed, Süleyman b. Turgud, Yakub b. Kurd ve gayruhüm mine’l-hâzırîn.