Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 169 Hüküm no: 158 Orijinal metin no: [26a-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hâtun bt. Bahşî’nin evini Vezir Cafer Paşa Vakfı’na istiğlâl yoluyla sattığı Medîne-i Ebâ Eyyûb el-Ensârî mahallâtından Câmi‘-i Kebîr mahallesinde sâkine olan Ayşe Hâtun bt. Bahşî nâm hâtun kıbelinden âtiyyü’z-zikr bey‘ ve istîcâr ikrârına vekâleti bimâ hüve nehci’s-sübût şer‘an sâbit olan Yusuf Çelebi b. İbrahim nâm kimesne, müvekkile-i mezbûresinin âtiyyü’z-zikr menzilini merhûm Vezir Cafer Paşa vakfı’na mütevellî olan hâfız-ı hâze’l-kitâb fahrü’l-a‘yân Ali Ağa b. Abdülmennân’a bey‘ ettiğini ikrâr ve i‘tirâf etti. Mütevellî-i mezbûr da vakf-ı mezbûr malıyla ve istiğlâl için mezbûre Ayşe Hâtun’un işbu akdin sudûruna kadar sâhibi ve mâliki olduğu elinde ve taht-ı tasarrufunda bulundurduğu mahalle-i mezbûrede vâki‘ olup bir tarafdan Mehmed Efendi b. Receb mülkü, diğer tarafdan merhûm Kara Ali vakfı, öbür tarafdan merhûm Bakırlı Muhyiddin vakfı ve diğer tarafdan da ekmekçi Mehmed mülkü ile mahdûd olan menzilini cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt kırk bin akçe-i Osmânî semen-i mu‘ayyen-i makbûzla iştirâ etti. Mezbûre Ayşe Hâtun’un menzil-i merkūmu kirâlamak istemesi üzerine müşterî-yi mezbûr ba‘de’t-tahliyye ve’t-tekābuz, 928 senesi gurre-i Zilka‘desi’nden bir sene tamâmına dört bin akçe ücret-i kirâ mukābilinde menzil-i merkūmu icâreye verdi. Mütevellî-i mezbûr vâki‘ ikrârı vicâhen ve şifâhen tasdîk etti. Müvekkile-i merkūmenin zevci Abdüllatif b. Keyvan el-Cündî ve yine müvekkile-i mezbûrenin oğlu Mehmed b. Hızır nâm kimesneler menzil-i mezbûrun derkine ve asl-ı meblağ-ı mersûma ve ücret-i merkūmeye îcâb ve kabûlü hâvî kefâletle kefîl oldu. Cerâ zâlike ve hurrire fi’l-yevmi’t-tâsi‘ aşer min Rebî‘ilâhir li târihi’l-mezbûr. Şuhûdü’l-hâl: Mustafa Efendi b. Mahmud, Hamza b. Abdullah, Mustafa b. el-Hâc Mehmed, el-Hâc Mustafa b. Osman el-Câbî, el-Hâc Mustafa b. Mehmed, Mustafa b. Mehmed ve gayruhüm