Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 170 Hüküm no: 159 Orijinal metin no: [26a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cafer b. Abdullah’ın arsasını Mustafa Efendi b. Hızır’a satması Medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Fethi Çelebi mahallesi sükkânından Cafer b. Abdullah nâm kimesne meclis-i şer‘-i hatîr-i lâzımü’t-tevkīrde işbu hâfız-ı hâze’l-kitâb fahrü erbâbi’t-tahrîr ve’l-kalem zahrü ashâbi’t-takrîr ve’r-rakam zü’l-kadri’l-alî ve’ş-şe’ni’l-celî hâlâ Rûznâmçe-i sânî’de başhalîfe olan Mustafa Efendi b. Hızır mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan ba‘zan Ahmed Paşa çayırına ve ba‘zan müşterî-i mezbûr mülküne ve bir tarafdan yine benim mülküme müntehî ve bir tarafdan Selime Hâtun mülküne ve bir tarafdan Kasım Halîfe mülküne müntehî zât-ı eşcâr-ı müsmire ve gayr-ı müsmireyi hâvî bir kıt‘a mülk arz-ı hâliyemi cümle-i tevâbi‘ ve levâhıkı ve kâffe-i menâfi‘ ve merâfıkı ile mûmâ-ileyh Mustafa Efendi’ye dört bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i müsemmen eyledim ba‘de’l-yevm sâlifü’l-beyân hudûd ile mahdûd olan bir kıt‘a mülk arz-ı hâliyem mûmâ-ileyh Mustafa Efendi’nin mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-mûmâ-ileyh Mustafa Efendi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Ahmed Efendi b. Mehmed el-Kadı, Abdülcelil Efendi b. Mehmed el-Kadı, Mahmud Çelebi b. Ahmed el-Cündî Yusuf Bey b. Abdullah Çavuş, İbrahim Bey b. Abdullah el-Cündî Rıdvan Dede b. Abdullah el-Mevlevî, Mustafa b. Mehmed, Yakub b. Kurd, Süleyman b. Kurd, Ali b. Abdullah ve gayruhüm mine’l-hâzırîn.