Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 173 Hüküm no: 137 Orijinal metin no: [18a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Hatice’nin vasîsi el-Hâc Ali’de kalan alacağın vârisleri tarafından sulh yolu ile tahsil edildiği İbrâ da‘vâsı Mahmiye-i İstanbul’da Dülgerzâde mahallesi sükkânından iken bundan akdem vefât eden Ali Beşe b. Hüseyin nâm kimesnenin verâseti sulbiye sagīre kızı Hatice ile li ebeveyn ammi oğulları Receb Beşe ve Osman Beşe ibney Zülfikār’a münhasıra olup ba‘de’l-kısme mezbûre Hatice dahi vefât edip verâseti mezbûrân Receb Beşe ve Osman Beşe’ye münhasıra olduğu şer‘an zâhir ve mütehakkik oldukdan sonra mezbûrân Receb Beşe ve Osman Beşe taraflarından husûs-ı âti’l-beyâna vekîl olduğu Hüseyin Efendi b. Eyüb ve Paşazâde [18b] demekle ma‘rûf Ahmed Çavuş nâm kimesneler şehâdetleri ile şer‘an sâbit olan Ahmed Efendi b. Eyüb nâm kimesne meclis-i şer‘-i şerîf-i lâzımü’t-teşrîfde bâ‘isü’l-kitâb el-Hâc Ali b. Abdünnebi nâm kimesne mahzarında bi’l-vekâle ikrâr ve takrîr-i kelâm edip müvekkilân-ı mezbûrânın mûriseleri sagīre-i mezbûrenin merkūm el-Hâc Ali kıbel-i şer‘-i enverden mansûb vasîsi defter-i kassâm mûcebince babasından isâbet eden otuz bir bin iki yüz seksen bir akçesini bi’l-vesâye kabz edip ba‘de’l-vefât meblağ-ı mezbûrun yirmi dört bin akçesini müvekkilân-ı mezbûrâna teslîm edip yedi bin iki yüz akçesini kendi mesârifine sarfla istihlâk edip zimmetinde kalmağla bundan akdem meblağ-ı mezbûru merkūm el-Hâc Ali’den müvekkilân-ı mezbûrân Receb Beşe ve Osman Beşe taleb ettiklerinde mezbûr el-Hâc Ali dahi inkâr etmekle beynlerinde münâza‘ât-ı kesîre vakı‘a olmuşidi el-hâletü hâzihî muslihûn tavassut edip meblağ-ı mezbûr da‘vâsından müvekkilân-ı mezbûrân Receb Beşe ve Osman Beşe ile merkūm el-Hâc Ali beynlerinde bin beş yüz akçe üzerine inşâ-i akd-i sulh ettiklerinde müvekkilân-ı mezbûrân dahi sulh-i mezbûru kabûl edip bedel-i sulh olan meblağ-ı mezbûr bin beş yüz akçeyi mezbûr el-Hâc Ali yedinden tamâmen ahz u kabz edip husûs-ı mezbûra müte‘allika da‘vâdan mezbûr el-Hâc Ali’nin zimmetini ibrâ-i âm ile ibrâ ve iskāt eylediler dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’r-râbi‘ min Cemâziyelevvel li sene seb‘a ve seb‘în ve elf. Şuhûdü’l-hâl: İbrahim Çelebi b. Ahmed, Şükrullah Bey b. Mustafa, Abdi Çelebi b. Hüseyin, Baba Resul b. Rıdvan.