Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 174 Hüküm no: 138 Orijinal metin no: [18b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Solak Ahmed Ağa b. Ali’nin câriyesi Belkıs’ı âzat ettiği İtâknâme Dârü’l-hilâfeti’l-aliyye Kostantıniyye el-mahmiyye’de Hoca Halil Attâr mahallesi ahâlîsinden olup hâlâ mahrûse-i Edirne’de olan Solak Ahmed Ağa b. Ali tarafından vech-i âtî üzre ikrâra vekîl olan mahalle-i mezbûre sükkânından müezzin Ahmed Halîfe b. Himmet nâm kimesne ile Ümmühâni bt. Yusuf ve Vildan bt. Abdullah nâm hâtunlar şehâdetleri ile şer‘an sâbit olup mahalle-i mezbûre imâmı olan Mustafa Efendi b. Siyâmi nâm kimesne meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda bi’l-vekâle ikrâr ve takrîr-i kelâm edip müvekkil-i mezbûr kendiye rıkkıyyetini mu‘terife olan işbu orta boylu, açık kaşlı, sarı elâ gözlü Rûsiyyetü’l-asl bâ‘iset-i hâze’l-kitâb Belkıs bt. Abdullah nâm câriye-i memlûkesini târih-i kitâb senesi şehr-i Ramazân-ı şerîfinde hasbeten li’llâh ıtlâk, malımdan tahrîr ve i‘tâk ve zümre-i harâir-i asliyyâta ilhâk eyledi mevsûfe-i mezbûre şehr-i mezbûrdan beri hürre olup üzerinde müvekkil-i mezbûrun velâ-i şer‘îden gayrı hakkı kalmadı dedikde mâ vaka‘a bi’t-taleb ketb olundu. Fi’l-yevmi’l-ışrîn min Cumâdelûlâ li sene seb‘a ve seb‘în ve elf Şuhûdü’l-hâl: Şerbetçi el-Hâc Musa, el-Hâc Mehmed, pazarcı el-Hâc Ramazan, kapıcı İsmail Bey, Abdi Çelebi b. Hüseyin.