Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 173 Hüküm no: 164 Orijinal metin no: [27a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Mustafa Bey’in karısı Ayşe Hâtun’u bıçakla yaralaması Havâss-ı Aliyye kazâsı tevâbi‘inden Hasköy mahallâtından Abdüsselâm mahallesi sâkinelerinden Ayşe Hâtun bt. el-Hâc ( ) tarafından husûs-ı âti’l-beyânı da‘vâ ve talebe ve lede’l-hükkâmi’l-kirâm mürâfa‘a ve muhâsamaya vekîl olup vekâleti hasm-ı şer‘î-i câhid mahzarında Hüseyin b. Abdullah el-İmâm ve Sefer b. Memi şehâdetleri ile şer‘an sâbite ve mütehakkika olan el-Hâc Ahmed b. Mahmud nâm kimesne meclis-i şer‘-i hatîr-i lâzımü’t-tevkīrde merkūme Ayşe’nin hâlâ zevci olup işbu hâzır bi’l-meclis olan Mehmed Bey b. Mustafa Bey el-Cündî’yi ihzâr ve mahzarında bi’l-vekâle takrîr-i da‘vâ edip mezbûr Mehmed Bey müvekkile-i merkūme Ayşe’yi târih-i kitâb gecesi sol yanından bıçak ile urup mecrûhe eylemişdir cerâhat-i merkūmeden fevt olmak ihtimâli vardır husûs-ı merkūm mezbûr Mehmed Bey’den suâl olunup bi hasebi’ş-şer‘i’ş-şerîf ihkāk-ı hak olunması matlûbumdur dedikde akībe’s-suâl mezbûr Mehmed Bey husûs-ı merkūm minvâl-i muharrer üzre olduğunu bi’l-külliyye inkâr edicek vekîl-i mezbûrdan sıdk-ı kelâmını mübeyyine beyyine taleb olundukda udûl-i müslimîn ve sikāt-ı muvahhidînden Mehmed b. Mahmud ve Ahmed b. Mustafa ve Ali b. Ahmed nâm kimesneler li ecli’ş-şehâde meclis-i şer‘a hâzırûn olup her biri cevâblarında fi’l-vâki‘ merkūm Ayşe’nin zevci mezbûr Mehmed Bey bizim huzûrumuzda târih-i kitâb günü vakt-i zuhrda zevcesi merkūme Ayşe’yi bıçak ile urdum ne lâzım gelir deyû alâ tarîki’l-unf ikrâr eyledi bu husûsa minvâl-i meşrûh üzre şâhidleriz şehâdet dahi ederiz deyû edâ-i şehâdet-i şer‘iyye ettiklerinde mezbûrûnun şehâdetleri hayyiz-i kabûl ve mahall-i irtizâda vâkı‘a oldukdan sonra mâ hüve’l-vâki‘ alâ vukū‘ihî bi’t-taleb ketb ve imlâ olundu. Hurrire fî evâhiri Rebî‘ilâhir li sene tis‘a ve ışrîn ve elf. Şuhûdü’l-hâl: İbrahim b. Receb, Mustafa b. Mehmed, Hüseyin b. Şeyhî, Ebûbekir b. Ahmed, Ali b. Abdullah, Mehmed b. Abdullah, Yakub b. Kurd, Mahmud Çelebi b. Ahmed ve gayruhüm mine’l-hâzırîn.