Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 174 Hüküm no: 165 Orijinal metin no: [27a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Behram’ın menzilini İbrahim Bey b. Hacı Ahmed’e satıp bazı emlâkinin de kullanım hakkını devretmesi Medîne-i Ebâ Eyyûb -râdiye anhu Rabbühü’l-Bârî- mahallâtından Evlice Baba mahallesi sâkinelerinden Fâtıma Hâtun bt. Behram nâm hâtun meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb İbrahim Bey b. el-Hâc Ahmed muvâcehesinde bi’t-tav‘ ve’r-rızâ ikrâr ve takrîr-i kelâm edip Havâss-ı Aliyye kazâsı müzâfâtından Terkos nâhiyesine tâbi‘ Birinci nâm karyede vâki‘ bir tarafdan mescid-i şerîf ve bir tarafdan vâdiye ve iki tarafdan tarîk-i âma müntehî ve mahdûd iki fevkānî beyti ve bir ahırı müştemil mülk menzilimi cümle-i tevâbi‘ ve levâhıkı ile mezbûr İbrahim Bey’e iki bin yedi yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen-i ma‘dûd ve teslîm-i mebî‘-i mahdûd kıldığımdan sonra yine karye-i merkūme sınırı dâhilinde Yaylak nâm mevzi‘de vâki‘ lede’l-ahâlî bir kıt‘a tarlanın ve Meşelik nâm mevzi‘de bir kıt‘a tarlanın ve Ayvalı nâm mevzi‘de bir kıt‘a ve Kavak çayırında vâki‘ bir kıt‘a ve Sarıyanlı nâm mevzi‘de bir kıt‘a cem‘an taht-ı tasarrufumda olan beş kıt‘a tarlaların hakk-ı tasarruflarını sâhib-i arz ma‘rifetiyle mezbûr İbrahim Bey’e sâhib-i arz ma‘rifetiyle tefvîz edip ol dahi minvâl-i muharrer üzre tefevvüz ve kabûl kıldıkdan sonra mukābele-i tefvîzde olan üç yüz nakd-i mezbûrü’n-na‘t akçeyi mezbûrun yedinden bi’t-tamâm ahz ve kabz eyledim ba‘de’l-yevm sâlifü’l-beyân menzil-i mahdûd merkūm İbrahim Bey’in mülk-i müşterâ-yı sarîhidir ve mârrü’z-zikr mevâzi‘-i müteferrikada vâki‘ beş kıt‘a tarlaların hakk-ı tasarrufları mersûmundur keyfe mâ yeşâ ve yahtâr mutasarrıf olsun dedikde mukırra-i mezbûrenin vech-i muharrer üzre cârî olan ikrâr ve takrîrin el-mukarru lehü’l-mezbûr İbrahim Bey bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fî evâili şehri Rebî‘ilâhir li sene tis‘a ve ışrîn ba‘de’l-elf. Şuhûdü’l-hâl: es-Seyyid Yunus b. Seydî, el-Hâc Yusuf b. el-Hâc Nebi, Ali Bey b. Abdullah, Hüseyin b. Süleyman, Kurd b. Abdullah, Süleyman b. Turgud, Yakub b. Kurd, Mustafa b. Mehmed, Perviz b. Abdullah ve gayruhüm.