Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 175 Hüküm no: 166 Orijinal metin no: [27a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Abdülmennân’ın menzilini Zamâne bt. Abdullah’a satması Mahmiye-i Kostantıniyye -humiyet ani’l-âfât ve’l-beliyye- hısnı ebvâbından Yenikapı hâricinde merhûm Merkez Efendi mahallesi sükkâ[nından] fahrü’l-emâsil ve’l-a‘yân Mehmed Ağa b. Abdülmennân nâm kimesne tarafından husûs-ı âti’l-beyânı bey‘ ve kabz-ı semene vekîl olup vekâleti hasm-ı şer‘î-i câhid mahzarında Mustafa b. Mehmed ve Yakub b. Abdullah nâm kimesneler şehâdetleri ile şer‘an sâbite olan zevcesi Râbia bt. İbrahim nâm hâtun vekâleten meclis-i şer‘-i hatîr-i lâzımü’t-tevkīrde işbu râfi‘atü’l-kitâb Zamâne bt. Abdullah nâm hâtun mahzarında bi’t-tav‘ ve’r-rızâ ikrâr ve takrîr-i kelâm edip mahalle-i merkūmede vâki‘ bir tarafı Rıdvan b. Abdullah mülkü ve bir tarafdan Ali Çelebi b. Mustafa mülkü ve bir tarafdan merhûm Şah Sultan vakfı ve bir tarafı tarîk-i âma müntehî olup bir bâb süflî odayı ve sofayı ve cüneyneyi ve kenîfi ve muhavvatayı müştemil olan müvekkilim mezbûr Mehmed Ağa’nın mülk menzilini cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûre Zamâne Hâtun’a üç bin beş yüz nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd kıldım ba‘de’l-yevm sâlifü’l-beyân menzil-i mahdûd mezkûre Zamâne Hâtun’un mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıfe olsun dedikde vekîl-i mezbûrenin vech-i mübeyyen üzre cârî olan ikrâr ve takrîrin el-mukarru lehü’l-mezbûre Zamâne bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb ve imlâ ve tahrîr [ve] inşâ olundu. Hurrire fi’l-yevmi’t-tâsi‘ ve’l-ışrîn min Rebî‘ilâhir li sene tis‘a ve ışrîn ve elf. Şuhûdü’l-hâl: Ali Efendi b. Ahmed el-İmâm, Abdi Çelebi b. eş-Şeyh Mustafa el-İmâm, Ali Dede b. Kurd el-Müezzin, Mustafa b. İskender el-Kayyım, Rıdvan b. Abdullah, Kurd b. Abdullah, Mustafa b. Mehmed, Ali b. Abdullah, Mehmed b. Mustafa ve gayruhüm mine’l-hâzırîn.