Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 175 Hüküm no: 167 Orijinal metin no: [27b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine Hâtun’un menzilini Safiye Hâtun bt. Yahya’ya satması Mahmiye-i Kostantıniyye -humiyet ani’l-âfât ve’l-beliyye- mahallâtından Çakır Ağa mahallesi sâkinelerinden Emine bt. (...) meclis-i şer‘-i hatîr-i lâzımü’t-tevkīrde işbu hâmiletü hâze’l-kitâb Safiye Hâtun bt. el-merhûm Yahya tarafından husûs-ı âti’l-beyânı tasdîka vekîl olup vekâleti hasm-ı şer‘î-i câhid mahzarında Eyüb b. Süleyman ve Sinan b. Abdi el-Cündî şehâdetleri ile şer‘an sâbite ve mütehakkika olan fahrü’l-cüyûş el-Hâc Mehmed Çavuş b. Mustafa nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Şah Sultan mahallesinde vâki‘ bir tarafdan Taşçı Kasım b. Abdullah mülkü ve üç tarafdan tarîk-i âma müntehî bir bâb fevkānî ve bir tahtânî beyti ve bir küçük odayı müştemil mülk menzilimi cümle-i tevâbi‘ ve levâhıkı ile müvekkile-i merkūme Safiye Hâtun’a on yedi bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd kıldım ba‘de’l-yevm sâlifü’l-beyân menzil-i mahdûd müvekkile-i merkūme Safiye’nin mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıfe olsun dedikde mukırra-i mezbûrenin vech-i mübeyyen üzre cârî olan ikrâr ve takrîrin vekîl-i mezbûr el-Hâc Mehmed Çavuş vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fî evâhiri Rebî‘ilâhir li târihi’l-mezbûr. Şuhûdü’l-hâl: eş-Şeyh Mustafa b. eş-Şeyh Mehmed, Mehmed b. Hasan ez-Zâkir, Abdülkerim b. İlyas, Mahmud Dede b. Hasan, Mustafa b. Mehmed, Ramazan b. Hasan, el-Hâc Muharrem b. Ali, Mahmud b. Ali, Ali b. Abdullah ve gayruhüm mine’l-hâzırîn.