Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 176 Hüküm no: 168 Orijinal metin no: [27b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın mülk davasında Lamberlo v. Kostantin ile sulh olması Vilâyet-i Rumeli’nde Mora sancağında nefs-i Gördös sâkinlerinden Mehmed b. Abdullah nâm kimesne meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Lamberlo v. Kostantin nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip bundan akdem küfrüm zamânında babam olan Yorgo v. İsperloti nâm zimmî mürd oldukda verâseti bana münhasıra olmağın mezbûr Lamberlo babam mürd-i mezbûrun terekesinden olan emlâkden kazâ-i mezbûr bağları dâhilinde Varye demekle ma‘rûf mevzi‘de vâki‘ iki tarafdan Nikola v. Ricso mülküne ve bir tarafdan İspolyoki v. Komi mülküne ve bir tarafdan Dimo v. Palaş mülküne müntehî ve mahdûd bir kıt‘a vâzı‘u’l-yed olduğu ecilden da‘vâ ve taleb ettiğimde mezbûr Lamberlo dahi baban mürd-i mezbûrdan hâl-i hayâtında iştirâ eyledim demekle beynimizde münâza‘ât-ı kesîre ve muhâsamât-ı şedîde vâkı‘a olmuşidi el-hâletü hâzihî beynimize müslimûn-ı muslihûn tavassut edip es-sulhu seyyidü’l-ahkâm fehvâsınca tâmmü’l-vezn ve kâmilü’l-ayâr bir sikke-i hasene üzre akd-i sulh inşâ ettiklerinde ben dahi sulh-i mezbûru kabûl ve bedel-i sulh olan sikke-i haseneyi merkūm Lamberlo yedinden ahz ve kabz edip mezbûrun zimmetini husûs-ı mezbûru da‘vâ ve talebden ibrâ-i âmla ibrâ ve iskāt-ı tâmla iskāt eyledim ba‘de’l-yevm husûs-ı mezbûra müte‘allik benden bi’z-zât ve bi’l-vâsıta da‘vâ ve nizâ‘ sudûr ederse lede’l-hükkâmi’l-kirâm makbûle ve mesmû‘a olmaya dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-mezbûr Lamberlo bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ ve’l-ışrîn min Rebî‘ilâhir li târihi’l-mezbûr. Şuhûdü’l-hâl: Hasan Bölükbaşı, Mustafa Efendi b. ( ) el-Müderris, Hüseyin b. Ramazan, Mehmed b. Ali, Mahmud b. Ali, Mustafa b. Mehmed, Süleyman b. Turgud, Ali b. Abdullah, Perviz b. Abdullah ve gayruhüm mine’l-hâzırîn.