Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 181 Hüküm no: 174 Orijinal metin no: [25(2)b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Polihroni Akmeşipolid v. Angeli’nin bahçesini Mustafa b. Dursun’a sattığı Vilâyet-i Rumeli’nde Mizistire kazâsı tevâbi‘inden Vordonya nâm karye sâkinlerinden Poliharon Akmeşipolid v. Angeli nâm zimmî meclis-i şer‘-i hatîr-i lâzımü’t-tevkīrde işbu hâfız-ı hâze’l-kitâb Mustafa b. Dursun nâm râcil mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūme kurbunda vâki‘ iki tarafdan yine müşterî-i mezbûr mülküne ve iki tarafdan tarîk-i âma müntehî ve mahdûd zât-ı eşcâr-ı müsmire ve gayr-ı müsmireyi müştemil bir kıt‘a mülk bahçemi cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Mustafa Beşe’ye iki bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân hudûd ile mahdûd olan bir kıt‘a mülk bahçe mezbûr Mustafa Beşe’nin mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Mustafa Beşe vicâhen tasdîk edicek mâ hüve’l-vâki‘ bi’t-taleb ketb olundu. Şuhûdü’l-hâl: (…) b. Abdullah, Yusuf b. Abdullah, Hasan b. İbrahim, Mehmed b. Abdullah er-Râcil, Mustafa b. Mehmed, Ali b. Abdullah, Kiryasi [b.] Andriye, Nikola [b.] Minho, Yani [b.] Zorgomali, Yani [b.] Andriye, Yorgaki [b.] Dimitri ve gayruhüm mine’l-hâzırîn.