Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 183 Hüküm no: 178 Orijinal metin no: [26(2)a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Merhum Zeynelabidin’in Taşköprü’deki bahçesinin varisleri tarafından Hamza Bey b. Mehmed’e satıldığı Vilâyet-i Anadolu’da nefs-i Taşköprü kazâsına tâbi‘ Edhem nâm karye sükkânından iken bundan akdem vefât eden Zeynelabidin nâm kimesnenin verâseti sulbî sagīr oğlu Ömer’e ve zevce-i metrûkesi Aynî bt. Musa nâm hâtuna münhasıra oldukdan sonra mezbûre Aynî kendi tarafından asâleten ve sagīr-i mezbûr tarafından vesâyeten meclis-i şer‘-i hatîr-i lâzımuü’t-tevkīrde işbu hâmilü’l-kitâb Hamza Bey b. Mehmed nâm cündi mahzarında bi’t-tav‘ ve’r-rızâ ikrâr ve takrîr-i kelâm edip müteveffâ-yı mezbûrun terekesinden olup karye-i merkūmede vâki‘ bir tarafdan Kurd Bey b. ( ) mülküne ve bir tarafdan merhûm ( ) nâm kimesnenin mescidine ve bir tarafdan Oruç b. ( ) mülküne ve bir tarafdan tarîk-i âma müntehî ve mahdûd bir tahtânî beyti ve bir harâbe yurdunu müştemil zât-ı eşcâr-ı müsmire ve gayr-ı müsmireyi hâvî bi hasebi’l-irsi’ş-şer‘î ikimize intikāl eden mülk bahçesini cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Hamza Bey’e sagīr-i mezbûrun zarûret-i nafakası ve müteveffâ-yı mezbûrun mescid-i mezbûra olan iki bin altı yüz akçe deyn-i müsbetini edâ için iki bin dokuz yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i mezbûru taslît eyledim ba‘de’l-yevm sâlifü’l-beyân hudûd ile mahdûd olan bir kıt‘a bahçe mezbûr Hamza Bey’in mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırre-i mezbûrenin minvâl-i muharrer üzre cârî olan ikrâr ve takrîrini el-mukarru lehü’l-mezbûr Hamza Bey bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-evvel min Cumâdelûlâ li sene tis‘a ve ışrîn ve elf. Şuhûdü’l-hâl: İslam b. Hüseyin, Şaban b. Halil, Receb b. Halil, Hızır b. Mehmed ve gayruhüm mine’l-hâzırîn.