Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 183 Hüküm no: 179 Orijinal metin no: [26(2)a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Mehmed’in menzilini Mehmed Çelebi b. Mahmud’a sattığı Medîne-i Ebâ Eyyûb el-Ensârî -radıye anhu Rabbühü’l-Bârî- mahallâtından Kızıl Mescid mahallesi sükkânından Ahmed b. Mehmed nâm kimesne tarafından husûs-ı âti’l-beyânı ikrâra vekîl olup vekâleti hasm-ı şer‘î-i câhid mahzarında Mustafa b. Osman ve Ali Çelebi b. Mehmed es-Sarrâcü’s-sultanî şehâdetleri ile şer‘an sâbite ve müte‘ayyine olan fahrü’l-akrân Ali Ağa b. Abdülmennân nâm kimesne meclis-i şer‘-i hatîr-i lâzımü’t-tevkīrde işbu râfi‘ü hâze’l-kitâb fahrü erbâbi’t-tahrîr ve’l-kalem Mehmed Çelebi b. Mahmud mahzarında bi’l-vekâle ikrâr ve takrîr-i kelâm edip mahalle-i mezbûrede vâki‘ müvekkilim mûmâ-ileyh Ahmed’in silk-i mülk-i sahîhinde münselik olan bir tarafdan Acem Mehmed Çavuş[’un] sâkin olduğu vakfa ve bir tarafdan Âbıkevser bt. Abdullah mülküne ve bir tarafdan Ali Reis mülküne ve bir tarafdan tarîk-i âma müntehî olup bir tahtânî ve bir fevkānî beyti ve bi’r-i mâyı [ve] kenîfi ve bir sundurmayı ve zât-ı eşcâr-ı müsmire ve gayr-ı müsmireyi hâvî muhavvatayı müştemil mülk menzilini cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Mehmed Çelebi’ye on bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘-i mahdûd kıldım ba‘de’l-yevm sâlifü’l-beyân menzil-i mahdûd mezkûr Mehmed Çelebi’nin mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde vekîl-i mezbûrun minvâl-i muharrer üzre cârî olan ikrâr ve takrîrin el-mukarru lehü’l-mezbûr Mehmed Çelebi vicâhen tasdîk edicek mâ hüve’l-vâki‘ gıbbe’l-ibtigā ketb olundu. Hurrire fi’l-yevmi’s-sânî aşer min Cumâdelûlâ li sene tis‘a ve ışrîn ve elf. Şuhûdü’l-hâl: Fahrü erbâbi’t-tahrîr ve’l-kalem Derviş Efendi b. Mehmed Kâtib-i mahkeme-i Bidâyet-i Vefa? ve Kostantıniyye el-mahmiyye, Süleyman Çelebi b. Sünbül el-Müezzin, Osman Çelebi b. Ahmed el-Müezzin, es-Seyyid Mehmed b. es-Seyyid Hızır, Keyvan b. Abdullah, Hüseyin Çelebi b. Abdullah, Hüseyin Bey b. Hasan, Mustafa b. Mehmed, Süleyman b. Turgud, Perviz b. Abdullah, muharrirü’l-hurûf Mehmed Efendi b. el-merhûm Esedüddin ve gayruhüm mine’l-hâzırîn.