Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 184 Hüküm no: 180 Orijinal metin no: [26(2)b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Apostol v. Koleko’nun mülk menzil, bostan yeri ve bir adet ceviz ağacını İstemo’ya sattığı Vilâyet-i Rumeli (…) Apostol v. Koleko nâm zimmî meclis-i şer‘-i (…) nâm zimmî muvâcehesinde bi’t-tav‘ ve’r-rızâ ikrâr ve takrîr-i (…) ve bir tarafdan Hirsafi bt. Franko nâm nasraniye mülküne ve bir tarafdan tarîk-i (…) ve zât-ı eşcâr-ı müsmire ve gayr-ı müsmire[yi] hâvî muhavvatayı müştemil mülk menzilimi ve menzil-i mezbûr (…) olup tahmînen iki dönüm mikdârı zât-ı eşcâr-ı müsmire ve gayr-ı müsmireyi hâvî bir kıt‘a mülk bostan yerimi ve zikr olunan bostana karîb yerde vâki‘ bir dib ceviz ağacını cümle-i tevâbi‘ ve levâhıkı ve kâffe-i menâfi‘ ve merâfıkı ile bi safkatin vâhidetin mezbûr İstemo’ya iki bin nakd-i fıddî-i Osmanî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı [semen] edip mebî‘ât-ı mezkûreyi mahallinde kabza müşterî-i merkūmu taslît eyledim ba‘de’l-yevm sâlifü’l-beyân mebî‘ât-ı mezbûre mezbûr İstemo’nun mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîri el-mukarru lehü’l-mezbûr İstemo bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâdis aşer min Cumâdelûlâ li sene tis‘a ve ışrîn ba‘de’l-elf. Şuhûdü’l-hâl: Mustafa b. Mehmed el-Muhzır, Süleyman b. Turgud, Yakub b. Kurd, Pîr Veli b. Abdullah, Ali b. Abdullah, Kiricsi v. Rizo, Askarlo v. Yani, Minho v. Andriye, Rizo v. Nikola, Armağan v. Moriş, Andriye [v.] Rizo, Kiricsi v. Apostol, İsteryano v. Koşkina, Yani v. Nikola.