Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 185 Hüküm no: 181 Orijinal metin no: [26(2)b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zanbine bt. Nikola’nın kocası Panayot’un mirası hususunda diğer varis Melisa’nın zimmetini ibra ettiği Havâss-ı Aliyye kazâsı tevâbi‘inden Küçükköy demekle ma‘rûf karyeden iken bundan akdem hâlik olan Panayot v. Todori nâm zimmînin verâseti li ebeveyn karındaşı Melisa nâm sagīre ve zevce-i metrûkesi Zanbine bt. Nikola nâm nasrâniyeye münhasıra oldukdan sonra mezbûre Zanbine meclis-i şer‘-i hatîr-i lâzımü’t-tevkīrde sagīr-i mezbûrun kıbel-i şer‘den mansûb vasiyy-i şer‘îsi olup işbu hâzır bi’l-meclis olan Yani v. Todori nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip hâlik-i merkūm Panayot’dan bi hasebi’l-irsi’ş-şer‘î bana isâbet eden rub‘ hisse-i şer‘iyye-i mevrûsem olan iki bin nakd-i fıddî-i Osmânî râyic fi’l-vakt akçeyi bi’t-tamâm ahz ü kabz edip husûs-ı mezbûra müte‘allika min ba‘d medhal ve alâkam yokdur dedikde mukırre-i mezbûrenin vech-i mübeyyen üzre cârî olan ikrâr ve takrîrini vasiyy-i mezbûr Yani bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ ve’l-ışrîn min Rebî‘ilâhir li sene tis‘a ve ışrîn ba‘de’l-elf. Şuhûdü’l-hâl: Abdurrahman Çavuş b. Hasan, Süleyman b. Turgud, Mustafa b. Mehmed, Ali b. Abdullah, Todori v. Mihal, Lika v. Nikola, Dimitri v. Lisari, Aleksandri v. Mihal, Kika v. Kiro, Dimo Bostancı-i Edirne [v.] Dimitri, Kominoz v. Nika, Minho v. Andriye.