Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 185 Hüküm no: 182 Orijinal metin no: [26(2)b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kostantin v. Polihroni’nin Andron v. Mihal’de olan alacağını tahsil ettiği Vilâyet-i Rumeli’nde Mora sancağında Londar kazâsına tâbi‘ Durah (Devrah) nâm karye sâkinlerinden Kostantin v. Polihroni nâm zimmî tarafından husûs-ı âti’l-beyânı da‘vâ ve talebe ve ahz ü kabza vekîl olup vekâleti hasm-ı şer‘î-i câhid mahzarında Yusuf b. Abdullah ve Mehmed b. Abdullah nâm kimesneler şehâdetleri ile şer‘an sâbit olan İstemad v. Yani nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Andron v. Mihal nâm zimmî mahzarında bi’l-vekâle ikrâr ve takrîr-i kelâm edip bundan akdem medîne-i Ebâ Eyyûb el-Ensârî -radıye anhu Rabbühü’l-Bârî-’de vâki‘ Ali Paşa Bostanı demekle ma‘rûf bostanda bostancılık san‘atında iken mürd olan mezbûr Polihroni’nin verâseti sulbî kebîr oğlu mezbûr Kostantin’e münhasıra olup mürd-i mezbûrun, merkūm Andron zimmetinde karz-ı şer‘îden olan bin nakd-i fıddî-i Osmanî râyic fi’l-vakt akçeyi vekâlet-i mahkiyem hasebiyle merkūm Andron yedinden bi’t-tamâm ve’l-kemâl ahz ü kabz eyledim dedikde mukırr-ı mezbûrun bi’l-vekâle cârî olan ikrâr ve takrîrin el-mukarru lehü’l-mezbûr Andron bi’l-muvâcehe tasdîk ve bi’l-müşâfehe tahkīk edicek mâ vaka‘a gıbbe’l-ibtigā sebt olundu. Hurrire fi’l-yevmi’s-sânî aşer min şehri Cumâdelûlâ li sene tis‘a ve ışrîn ve elf. Şuhûdü’l-hâl: Osman b. Mehmed, Hasan b. Şaban, Ali b. Veli, Mustafa b. Mehmed, Süleyman b. Turgud, Yakub b. Kurd.