Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 186 Hüküm no: 184 Orijinal metin no: [27(2)a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın mülk bağ hissesini Pasko v. Kini’ye sattığı Havâss-ı Aliyye kazâsı tevâbi‘inden Litroz nâm karye sâkinlerinden Mehmed b. Abdullah nâm kimesne meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Pasko v. Kini nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip işbu akdin sudûruna dek silk-i mülk-i sahîhimde münselik ve münharit olan emlâkden karye-i merkūme bağları dâhilinde vâki‘ bir tarafdan tarîk-i âma ve etrâf-ı selâsesi kireç ocağına müntehî ve mahdûd tahmînen beş dönüm bir kıt‘a mülk bağdan nısf hisse-i şâyi‘amı cümle tevâbi‘ ve levâhıkı ile mezbûr Pasko’ya bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd kıldım ba‘de’l-yevm sâlifü’l-beyân bağda nısf hisse-i şâyi‘am merkūm Pasko’nun mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun vech-i meşrûh üzre cârî olan ikrâr ve takrîrini el-mukarru lehü’l-merkūm Pasko tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâmin aşer min Cumâdelûlâ [li-sene tis‘a ve ışrîn ve elf]. Şuhûdü’l-hâl: Piri Bey b. Abdullah er-Râcil, Şaban b. Kurd, Hüdâverdi b. Mehmed, Sefer Beşe b. Abdullah er-Râcil.