Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 187 Hüküm no: 186 Orijinal metin no: [27(2)a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Yani’nin Osman b. Süleyman’dan alacaklı olduğu Bostancı tâifesinden Nikola v. Yani nâm zimmî meclis-i şer‘-i hatîr-i lâzımü’t-tevkīrde Osman b. Süleyman nâm kimesne üzerine takrîr-i da‘vâ edip mezbûr Osman ben vilâyetime gitdiğimde kız karındaşım Aynişah’ı Râziye nâm bir hâtun ayardıp ba‘zı esbâbını merkūme Râziye’ye verip ol dahi zikr olunan esbâbı benim yanımda emânet tarîki üzre vaz‘ eyledi deyû bana töhmet eyleyip işbu hâzır bi’l-meclis olan Kurd Beşe taht-ı yedinde olan malımdan fuzûlî beş bin akçemi ahz eylemekle zulüm eylemişdir suâl olunup ihkāk-ı hak olunmasını taleb eylerim dedikde gıbbe’s-suâl mezbûr Osman cevâbında fi’l-hakīka bundan akdem mezbûre kız karındaşım Aynişah’ı mezbûre Râziye ihtilâl edip bir mikdâr esbâbla ihrâc eyledikde merkūme Râziye zikr olunan esbâbı merkūm Nikola yanında emânet vaz‘ edip taleb ettikde mezbûr Nikola firâr edip merkūm Kurd Beşe vekâleten zikr olunan beş bin akçe üzerinde sulh edip ben dahi vekâletim hasebiyle Aynişah için meblağ-ı mezbûru alıp kabz eyledim lâkin sulh-i mezbûra, mezbûr zimmînin rızâ bi’t-tevkîli mukarrerdir deyû cevâb vericek gıbbe’s-suâl mezbûr Nikola husûs-ı mezbûra tevkîle rızâsı olduğunu inkâr edicek istişhâd olundukda şâhidlerim hâzır değildir deyû mehl-i şer‘î taleb eyleyicek istimhâl-i şer‘î kılındıkdan sonra meclisden ihrâc olunup ba‘de zâlik tekrâr hâzır bi’l-meclis olup ihzâr-ı şuhûddan aczi mütehakkik olmağın meblağ-ı merkūmun kıbel-i şer‘den edâsına hükm olunduğu mâ cerâ bi’t-taleb ketb olundu. Hurrire fi’l-yevmi’l-ışrîn min Cemâziyelevvel li seneti’l-merkūme. Şuhûdü’l-hâl: Mustafa b. Mehmed, Ali b. Abdullah, Yakub b. Kurd, (…) b. Bayram, Hasan b. Abdullah, Mehmed Bey b. Abdullah ve gayruhüm mine’l-hâzırîn.