Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 188 Hüküm no: 188 Orijinal metin no: [27(2)b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sitti bt. Abdullah’ın talebi üzerine kocasından kalan bahçe ve menzilin diğer varis Ümmügülsüm ile aralarında taksim olunduğu Medîne-i Ebâ Eyyûb-i Ensârî -radıye anhu Rabbühü’l-Bârî- mahallâtından merhûm Defterdâr Mahmud Efendi mahallesi sükkânından iken bundan akdem vefât eden es-Seyyid Mehmed b. Şaban nâm kimesnenin zevce-i metrûkesi Sitti Hâtun bt. Abdullah tarafından husûs-ı âti’l-beyâna vekîl olup vekâleti hasm-ı şer‘î-i câhid mahzarında nehc-i şer‘î-i mu‘teber üzre sâbite olan Mehmed Bey b. Abdullah nâm kimesne meclis-i şer‘-i hatîr-i lâzımü’t-tevkīrde takrîr-i kelâm edip mezbûr es-Seyyid Mehmed fevt oldukda verâseti zevce-i metrûkesi müvekkilem mezbûre Sitti Hâtun’a ve müteveffâ-yı mezbûrun li ebeveyn kız karındaşı olan Ümmügülsüm nâm hâtuna münhasıra oldukda terekesinin rub‘u müvekkilemin ve selâse-i erbâ‘ı merkūme Ümmügülsüm’ün hakk-ı mevrûsları olup mahalle-i mezbûrede vâki‘ bir tarafdan Ahîzâde demekle şehîr izzetlü Hüseyin Efendi hazretlerinin ve bir tarafdan Hâce Hâtun mülküne ve bir tarafdan tarîk-i âma ve bir tarafdan sâhil-i bahre müntehî olan mülk menzil ve menzil-i mezbûra muttasıl ve mülâsık bir kıt‘a bahçe mezbûretânın hakk-ı mevrûsları olmağın kıbel-i şer‘-i kavîmden üzerlerine varılıp alâ mâ faraza’llâhi te‘âlâ rub‘u müvekkilem merkūme Sitti Hâtun’a ve selâse-i erbâ‘ı merkūme Ümmügülsüm’e ta‘yîn ve tebyîn olunmak müvekkilemin matlûbudur dedikde savb-ı şer‘-i mutahhardan mevlânâ Mehmed Efendi b. Esedüddin irsâl olunup ol dahi hâssa mi‘mârlardan Üstâd Musli Çelebi b. Hüsameddin ve sâir binâ ve sukūf ahvâline küllî vukūf ve şu‘ûru olan zeyl-i kitâbda esâmîsi mastûre olan müslimîn ile menzil-i mezbûrun ve bahçe-i merkūmenin üzerlerine varılıp mesâha ettiklerinde mecmû‘u dört sehim farz olunup bir sehmi mezbûre Sitti Hâtun’un hisse-i şer‘iyye-i mevrûsesine ta‘yîn-i şer‘î ile müte‘ayyin olup ve üç sehmi merkūme Ümmügülsüm’ün hisse-i şer‘iyye-i mevrûsesine ta‘yîn-i şer‘î ile müte‘ayyin oldukdan sonra zikr olunan menzil beynlerinde taksîm olundukda mûmâ-ileyh Hüseyin Efendi hazretleri tarafından tarîk-i âm cânibinden hâlâ mezbûre Sitti Hâtun sâkine olduğu menzilin şehnişîninin nısfından bennâ zirâ‘ıyla üç zirâ‘ on dört parmak menzil müştemilât-ı ma‘hûdesiyle merkūme Sitti Hâtun’un sehmi olan rub‘ hisse-i şer‘iyye-i mevrûsesi mukābelesinde merkūmeye isâbet edip ve sâlifü’z-zikr menzilden zikr olunan şehnişînin nısfından tarîk-i âm cânibinden Hâce Hâtun mülkü tarafından hâlâ mezbûre Ümmügülsüm’ün sâkine olduğu bennâ zirâ‘ıyla yirmi yedi zirâ‘ iki parmak müştemilât-ı menzil-i ma‘hûdesiyle mezbûre Ümmügülsüm’ün sehmi olan selâse-i erbâ‘ hisse-i şer‘iyye-i mevrûsesi mukābelesinde merkūmeye isâbet ettikden sonra zikr olunan bahçe dahi mâbeynlerinde merkūme Sitti Hâtun’a sehmi olan rub‘ hisse-i şer‘iyye-i mevrûsesi mukābelesinde leb-i deryâdan mûmâ-ileyh Hüseyin Efendi hazretleri tarafından bennâ zirâ‘ıyla tûlen yetmiş dört ve arzen üç buçuk zirâ‘ bahçe isâbet edip ve zikr olunan bahçeden mâ‘adâsın merkūme Ümmügülsüm’e selâse-i erbâ‘ı olan hisse-i şer‘iyye-i mevrûsesi mukābelesinde isâbet edip birbirinin rızâları ile her biri hisse-i şer‘iyye-i mevrûselerini ahz ü kabz ettiklerini mevlânâ-yı mûmâ-ileyh mahallinde tahrîr edip ba‘dehû gelip meclis-i şer‘de alâ vukū‘ihî ihbâr etmeğin mâ hüve’l-vâki‘ bi’t-taleb ketb olunup yedlerine def‘ ve vaz‘ olundu. Hurrire fi evâsıtı Cumâdelûlâ li sene tis‘a ve ışrîn ve elf. Şuhûdü’l-hâl: Es-Seyyid Mehmed Efendi b. ( ) el-Müderris, Şaban Çavuş b. Ferruh, Mehmed Efendi b. Himmet el-İmâm, Hasan Efendi b. Nasuh el-İmâm, Hüseyin Efendi b. Hasan, Kenan b. Abdullah er-Râcil, Mehmed Çelebi b. Ahmed er-Râcil, Mehmed b. Abdullah, Kasım Çelebi b. Mehmed, es-Seyyid Mehmed b. es-Seyyid Mehmed, İbrahim Çelebi b. İsmail el-Kâtib ve gayruhüm mine’l-hâzırîn. Müsveddede kalmağla bu mahalde kayd olundu.