Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 190 Hüküm no: 190 Orijinal metin no: [28a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Mihal, Apostol v. Yorgi ve Dimitri v. Yorgi’nin Bostancı Mustafa Beşe b. Ali’ye borçlu oldukları Mahmiye-i Kostantıniyye hısnı ebvâbından Ebâ Eyyûb-i Ensârî -radıye anhu Rabbühü’l-Bârî- kapısı hârici sâkinlerinden Yorgi v. Mihal ve Apostol v. Yorgi ve Dimitri v. Yorgi nâm zimmîler meclis-i şer‘-i hatîr-i lâzımü’t-tevkīrde işbu hâfız-ı hâze’l-kitâb fahrü’l-akrân Mustafa Beşe b. Ali el-Bostanî mahzarında her biri ikrâr ve takrîr-i kelâm edip mezbûr Mustafa Beşe’ye zimmetimizde karz-ı şer‘îden yirmi bir bin beş yüz akçe ve târih-i kitâbdan yedi ay tamâmına varınca müeccel beynimizde ilm-i şer‘î ile ma‘lûm çuka bahâsından bin beş yüz akçe ki cem‘an yirmi üç bin akçe lâzımü’l-edâ ve vâcibü’l-kazâ deynimiz vardır dediklerinde mukırrûn-ı mezbûrûnun ikrâr-ı meşrûhlarını el-mukarru lehü’l-mezbûr Mustafa Beşe dahi vicâhen tasdîk ve şifâhen tahkīk ettikden sonra yine mevzi‘-i mezbûrda sâkin Todori v. Dimitri ve Andriye v. Todori nâm zimmîler meblağ-ı mezbûrun mecmû‘una emr ve kabûlü hâviye kefâletle kefîl olduklarında mâ vaka‘a bi’t-taleb ketb olunup yed-i tâlibe def‘ ve vaz‘ olundu. Hurrire fi’l-yevmi’t-tâsi‘ aşer min Cumâdelûlâ li sene tis‘a ve ışrîn ve elf. Şuhûdü’l-hâl: Hasan b. Mehmed, Piyâle Ağa Cizyedâr, Ahmed Ağa b. Haydar, Ali Beşe b. Ferhad er-Râcil, Mehmed b. Kasım, Mehmed Bey b. Abdullah, Mehmed Beşe b. Abdullah er-Râcil, Hüseyin b. Ali.