Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 191 Hüküm no: 192 Orijinal metin no: [28a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Abdullah’ın Belgrad köyündeki çayırının tasarruf hakkını Hacı Receb Bey b. Ali’ye devrettiği Dârü’s-saltanati’s-seniyye Kostantıniyye el-mahmiyye’de vâki‘ Karaca Ahmed Efendi zâviyesi kurbunda sâkine fahrü’l-muhadderât zahrü’l-muvakkarât Hatice Hâtun bt. Abdullah tarafından husûs-ı âti’l-beyânı ikrâra vekîl olup vekâleti hasm-ı şer‘î-i câhid mahzarında Mustafa Çelebi b. Davud ve Hüseyin b. Abdullah şehâdetleri ile şer‘an sâbite ve mütehakkika olan fahrü’l-akrân İbrahim Bey b. Mehmed el-Kilârî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Saray-ı atîk teberdârlarından fahrü’l-cünûd ve’l-cüyûş el-Hâc Receb Bey b. Ali nâm kimesne tarafından husûs-ı âti’l-beyânı tasdîke vekîl olup vekâleti hasm-ı şer‘î-i câhid mahzarında el-Hâc Şaban b. Sefer el-Bevvâbü’s-sultânî ve İbrahim Çelebi b. İsmail el-Kâtib şehâdetleri ile şer‘an sâbite ve mütehakkika olan fahrü’l-eşbâh Hasan Beşe b. Bayram nâm kimesne mahzarında bi’l-vekâle ikrâr ve takrîr-i kelâm edip Havâss-ı Aliyye kazâsı müzâfâtından Terkos nâhiyesine tâbi‘ Belgrad nâm karye kurbunda vâki‘ merhûm ve mağfûrun-leh cennet-mekân-ı firdevs-âşiyân Ebü’l-feth Sultan Mehmed Hân hazretlerinin arâzi-i mevkūfesinden olup bir tarafdan Çoban Çavuş demekle şehîr kimesne çayırına ve bir tarafdan Dâye Hâtun çayırına ve bir tarafdan Kurd çayırına ve bir tarafdan vâdiye müntehî tahmînen iki dönüm bir kıt‘a müvekkilem mezbûre Hatice mutasarrıfe olduğu çayırın hakk-ı tasarrufunu sâhib-i arz ma‘rifetiyle müvekkil-i mûmâ-ileyh el-Hâc Receb’e tefvîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvizde olan altı bin nakd-i fıddî-i Osmânî râyic fi’l-vakt akçeyi müvekkil-i mezbûr el-Hâc Receb yedinden bi’t-tamâm ve’l-kemâl müvekkilem mezbûre Hatice Hâtun ahz ü kabz eyledi ba‘de’l-yevm sâlifü’l-beyân çayır-ı mahdûdun hakk-ı tasarrufu müvekkil-i mezbûr el-Hâc Receb sâir emsâli tasarrufu gibi keyfe mâ yeşâ mutasarrıf olsun dedikde vekîl-i mezbûrun minvâl-i muharrer üzre cârî olan ikrâr ve takrîrini vekîl-i mersûm Hasan Beşe vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sânî vel-ışrîn min Cumâdelûlâ li seneti’l-merkūme. Şuhûdü’l-hâl: Hüseyin Beşe b. Abdullah el-Bevvâbü’s-sultânî, el-Hâc Hasan b. ( ) el-Bevvâbü’s-sultânî, el-Hâc Şaban b. Sefer el-Bevvâbü’s-sultânî, İbrahim Çelebi b. Mehmed, Ahmed Çelebi b. Mehmed, Hasan Çavuş b. Ali, Mustafa b. Mehmed, Ali b. Abdullah.