Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 192 Hüküm no: 193 Orijinal metin no: [28b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Foti v. Diyani’nin Kiricsi ile olan mülk davasında sulh olması Vilâyet-i Rumeli’nde Avlonya sancağında Ergirikasrı (...) Foti v. Diyani nâm zimmî meclis-i şer‘-i hatîr-i lâzımü’t-tevkīrde [Kiricsi nâm] zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip bundan akdem [Foti v.] Diyani hâlik oldukda verâseti bana münhasıra olup ben sagīr olmağın ahvâlimi hıfza ve umûrumu [tesviyeye] kıbel-i şer‘den mansûb vasiyy-i şer‘îm olan Sago v. Sino nâm zimmî babam hâlik-i mezbûrun terekesinden olup bi hasebi’l-irsi’ş-şer‘î bana intikāl eden emlâkden karye-i merkūmede Seviro demekle ma‘rûf mevzi‘de vâki‘ bir tarafdan Yorgo v. Bozacı mülküne ve bir tarafdan Yani v. Harido mülküne ve bir tarafdan Zope v. Lefteri mülküne ve bir tarafdan tarîk-i âma müntehî ve mahdûd bir kıt‘a mülk-i mevrûsum olan bağı vasiyy-i mezbûr Sago hâlik-i mezbûrun zarûret-i deyni ve benim zarûret-i nafakaya ihtiyâcım yoğiken zikr olunan bağı mezbûr Kiricsi’ye beş bin beş yüz nakd-i fıddî-i Osmânî râyic fi’l-vakt akçeye vesâyeten bi gayrı vech-i şer‘î bey‘-i bât ile bey‘ ve kabz-ı semen ve teslîm-i müsemmen eylemişdi hâlâ ben dahi zikr olunan bağı vasiyy-i mezbûr Manol’ün bey‘-i benim makbûlüm değildir deyû bey‘-i mezbûru fesh eylemek murâd edip zikr olunan bağı da‘vâ ve taleb etmekle beynimize muslihûn tavassut edip es-sulhu seyyidü’l-ahkâm fehvâsınca bin iki yüz nakd-i mezbûrü’n-na‘t akçe üzre akd-i sulh inşâ ettiklerinde ben dahi sulh-i mezbûru kabûl ve bedel-i sulh olan meblağ-ı mersûm bin iki yüz akçeyi mezbûr Kiricsi yedinden bi’t-tamâm ve’l-kemâl ahz ve kabz edip husûs-ı mezbûra müte‘allik da‘vâdan mezbûr Kiricsi’nin zimmetini ibrâ-i âmla ibrâ ve iskāt-ı tâmla iskāt eyledim ba‘de’l-yevm husûs-ı mezbûra müte‘allik benden bi’z-zât ve bi’l-vâsıta da‘vâ ve nizâ‘ sudûr ederse lede’l-hükkâmi’l-kirâm mesmû‘a ve makbûle olmaya dedikde mukırr-ı mezbûrun minvâl-i muharrer üzre cârî olan ikrâr ve takrîrin el-mukarru lehü’l-mezbûr Kiricsi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ aşer min Cemâziyelevvel li târihi’l-mezbûr. Şuhûdü’l-hâl: Yorgo v. Şano, Yani v. Dimo, Farmoda v. Minho, Hristo v. Mihal, Hırsafo v. Yako, Kara Yani v. İstaso, Yani v. Pogal, Yorgo v. Sako, Zope v. Lefteri, Yorgo v. Koçi, Dimo v. Prako, Duka v. Minho ve gayruhüm mine’l-hâzırîn.