Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 193 Hüküm no: 194 Orijinal metin no: [28b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Neslişah Sultan Vakfı’na ait menzilin kullanım hakkının Muhsine Hâtun bt. Keyvan’a devredilmesi Mahmiye-i Kostantıniyye -humiyet ani’l-âfât ve’l-beliyye- mahallâtından ( ) mahallesi sâkinlerinden fahrü’l-muhadderât zahrü’l-muvakkarât Hâmide Hâtun bt. el-merhûm el-mebrûr -ed-dâricü ilâ medârici rahmeti Rabbihi’l-Gafûr- Sunullah Efendi hazretleri tarafından husûs-ı âti’l-beyânı ikrâra vekîl olup vekâleti hasm-ı şer‘î-i câhid mahzarında bimâ hüve nehci’l-mu‘teberi’l-mer‘î şer‘an sâbite olan fahrü’l-mülâzımîn Şaban Efendi b. Ali meclis-i şer‘-i hatîr-i lâzımü’t-tevkīrde işbu hâmiletü hâze’l-kitâb Muhsine Hâtun bt. Keyvan tarafından husûs-ı âti’l-beyânı tasdîka vekîl olup vekâleti hasm-ı şer‘î-i câhid mahzarında müvekkile-i merkūme Muhsine’yi ma‘rifet-i şer‘iyye ile ârifân olan Ali b. Süleyman ve Fazlullah Çelebi b. el-Hâc Ali şehâdetleri ile şer‘an sâbite olan fahrü’l-akrân el-Hâc Emrullah b. Mehmed nâm kimesne mahzarında bi’l-vekâle ikrâr ve takrîr-i kelâm edip medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından merhûm Zal Mahmud Paşa mahallesinde vâki‘ sâhibetü’l-hayrât ve’l-hasenât merhûme Neslişah Sultan vakfı’ndan olup bir tarafdan Çivizâde demekle şehîr Mehmed Efendi hazretleri mülküne ve bir tarafdan İskender Bey mescid-i şerîflerine ve tarafeyni tarîk-i âma müntehî olup icâre-i mu‘accele ve beher mâh altmış akçe ücret-i müeccele ile müvekkilem merkūme Hâmide’nin mutasarrıfe olduğu iki tahtânî ve bir fevkānî beyti müştemil menzilin hakk-ı tasarrufunu vakf-ı mezbûr mütevellîsi ma‘rifetiyle müvekkile-i mûmâ-ileyhâ Muhsine Hâtun’a tefvîz edip ol dahi minvâl-i muharrer üzre teveffüz ve kabûl ettikden sonra mukābele-i tefvîzde olan elli bin nakd-i fıddî-i Osmânî râyic fi’l-vakt akçeye müvekkile-i merkūme Muhsine Hâtun yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân menzil-i mahdûdun hakk-ı tasarrufu müvekkile-i merkūme Muhsine Hâtun’undur sâir emsâli tasarrufu gibi keyfe mâ yeşâ ve hasbe mâ yürîd mutasarrıfe olsun dedikde vekîl-i mersûm Şaban Efendi’nin vech-i mübeyyen üzre cârî olan ikrâr ve takrîrini vekîl-i mersûm el-Hâc Emrullah bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Mustafa Çelebi b. Mehmed, diğer Mustafa b. Mehmed, Fazlullah b. el-Hâc Ali, Ali Halîfe b. Hayreddin el-Mu‘allim, Bayram Efendi b. Şükrullah el-Hatîb bi câmi‘-i Zal Mahmud Paşa, Ali b. Abdullah, Yakub b. Kurd, Mehmed Beş ve gayruhüm mine’l-hâzırîn.