Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 194 Hüküm no: 195 Orijinal metin no: [28b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Bey b. Mahmud’un menzilini Fâtıma bt. Mehmed’e satması Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Kasımpaşa-yı Cezerî mahallesi sükkânından fahrü’l-akrân Ali Bey b. Mahmud er-Sarrâcü’s-sultânî meclis-i şer‘-i hatîr-i lâzımü’t-tevkīrde hâlâ zevcesi olan işbu hâmiletü hâze’l-kitâb Fâtıma bt. Mehmed nâm hâtun mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ iki tarafı Ebûbekir Çelebi mülküne ve bir tarafdan Sağır Şeyh mülküne ve bir tarafdan tarîk-i hâssa müntehî muhavvataynı muhtevî olup muhavvata-i dâhiliyyesi bir tahtânî ve bir fevkānî beyti ve dehlizi ve bir sofayı ve kileri ve matbahı ve zât-ı eşcâr-ı müsmire ve gayr-ı müsmireyi hâvî cüneyneyi müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile zevcem mezbûre Fâtıma Hâtun’a otuz iki bin nakd-i fıddî-i Osmânî râyic fi’l-vakt akçeye bey‘-i bâtt-ı [29a] [sahîh-i şer‘î ile bey‘ ve kabz-ı semen eyledim] ba‘de’l-yevm sâlifü’l-beyân menzil-i mahdûd (…) [mersûme Fâtıma Hâtun’un mülk-i müşterâ-yı] sarîhidir keyfe mâ yeşâ ve hasbe mâ yürîd mutasarrıfe olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûre Fâtıma Hâtun bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: eş-Şeyh İlmüddin b. Süleyman el-İmâm, Hasan b. Abdi el-İmâm, Mehmed b. ( ) el-Müezzin, Abdurrahman b. Habib er-Râcil, Yusuf b. Abdullah, İbrahim b. Kasım er-Râcil, Mustafa b. Mehmed, Ali b. Abdullah ve gayruhüm mine’l-hâzırîn.