Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 195 Hüküm no: 196 Orijinal metin no: [29a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sino, Kiricsi ve Riko adlı zimmîlerin sahip oldukları tarlanın kullanım hakkını Foti v. Diyani’ye devretmeleri Vilâyet-i Rumeli’nde Avlonya sancağında Ergirikasrı kazâsına tâbi‘ Sarakiste nâm karye sâkinlerinden Sino ve Kiricsi ve Riko nâm zimmîler meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Foti v. Diyani nâm zimmî mahzarında her biri bi’t-tav‘ ve’r-rızâ ikrâr ve takrîr-i kelâm edip karye-i merkūme kurbunda İstirçe demekle ma‘rûf mevzi‘de vâki‘ bir tarafdan Kordo v. Yorgo tarlasına ve bir tarafdan Yani v. Minho tarlasına ve bir tarafdan Kordo v. Yani tarlasına ve bir tarafdan vâdiye müntehî ve mahdûd tahmînen diyârımız keyli ile üç keyl tohum istî‘âb eder ale’l-iştirâk taht-ı tasarrufumda olan bir kıt‘a tarlanın hakk-ı tasarrufunu sâhib-i arz ma‘rifetiyle merkūm Foti’ye tevfîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîzde olan bin nakd-i fıddî-i Osmânî râyic fi’l-vakt akçeye merkūm Foti yedinden ale’l-iştirâki’s-seviy ahz ve kabz eyledik ba‘de’l-yevm sâlifü’l-beyân bir kıt‘a tarlanın hakk-ı tasarrufu mersûmundur sâir emsâli tasarrufu gibi mutasarrıf olsun dediklerinde mukırrûn-ı mezbûrûnun minvâl-i muharrer üzre cârî olan ikrâr ve takrîrlerini el-mukarru lehü’l-mezbûr Foti bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Yorgo v. Lano, Yani v. Dimo, Farmoda v. Minho, Hristo v. Mihal, Hırsafo v. Yako, Kara Yani v. İstaso Yani v. Pogal, Yorgo v. Sako, Zope v. Lefteri, Yorgo v. Koçi, Dimo v. Prako ve gayruhüm mine’l-hâzırîn.