Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 198 Hüküm no: 202 Orijinal metin no: [29b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Niko’nun Nikola v. Kini’ye bazı zeytin ağaçlarını satıp tarlasının da kullanım hakkını devretmesi Vilâyet-i Rumeli’nde Aydonat sancağında Mazaraki kazâsına tâbi‘ Rahova nâm karye sâkinlerinden Yani v. Niko nâm zimmî meclis-i şer‘-i mutahharda, işbu hâmil-i hâze’l-kitâb Nikola v. Kini nâm zimmî mahzarında ikrâr ve takrîr-i kelâm edip karye-i mezbûre sınırında vâki‘ bir tarafdan Kiro v. Dimo tarlasına ve bir tarafdan Yani v. Simo tarlasına ve bir tarafdan Yani v. Dıristo tarlasına ve bir tarafdan tarîk-i âm ile mahdûd olan tarlamın içinde olan beş dip mülk zeytin ağacımı mezbûr Nikola’ya beş yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip ve yine karye-i mezbûre sınırında Razolo nâm mevzi‘de vâki‘ bir tarafdan Yorgo v. Kiri ve bir tarafdan Yorgi v. Kini ve bir tarafdan Yorgi v. Yani ve bir tarafdan orman ile mahdûd olup tahmînen üç keyl tohum istî‘âb eden bir kıt‘a tarlamın hakk-ı tasarrufunu sâhib-i arz ma‘rifetiyle mezbûr Nikola’ya tevfîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîzde mezbûr Nikola yedinden iki yüz akçe ki cem‘an yedi yüz akçeyi mezbûrun yedinden ahz ve kabz edip mebî‘-i mezbûru kabza merkūm Nikola’yı taslît ettim dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-merkūm Nikola vicâhen tasdîk ve şifâhen tahkīk edicek mâ vaka‘a bi’t-taleb ketb ve tahrîr olunup yed-i tâlibe def‘ olundu. Hurrire fi’l-yevmi’s-sânî ve’l-ışrîn min Cemâziyelevvel li sene tis‘a ve ışrîn ve elf. Şuhûdü’l-hâl: Dimo v. Yani, Yani v. Kondi, Anderetso v. Lako, Minho v. Ranko, Kini v. Niko ve gayruhüm.