Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 176 Hüküm no: 141 Orijinal metin no: [18b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Ahmed’in, kız kardeşi Sâliha bt. Ahmed’de alacağı olduğunu ispat edemediği Mahmiye-i İstanbul’da Muhtesib Keçeci Pîrî mahallesinde sâkin Mehmed Çelebi b. Ahmed nâm kimesne meclis-i şer‘-i hatîrde kız karındaşı Sâliha bt. Ahmed nâm hâtun mahzarında üzerine da‘vâ ve takrîr-i kelâm edip merkūme Sâliha Hâtun zimmetinde yedimden müşterâ ve makbûz bir Selânik peştamalı bahâsından iki yüz akçe ve bir baş? peşkir bahâsından yüz elli akçe ve iki makrama bahâsından yüz yirmi akçe ve bir çift beledî yastık bahâsından yüz yirmi akçe ve bir serpûş bahâsından yüz akçe ki eşyâ-i mezkûre bahâsından altı yüz doksan akçe ile cihet-i deyn-i şer‘îden beş bin sekiz yüz akçe ve beynimizde ma‘lûm menzil ücretinden dahi beş bin akçe ki cem‘an on bir bin dört yüz doksan akçe hakkım olmağın hâlâ meblağ-ı mezbûru merkūme Sâliha Hâtun’dan taleb ederim suâl olunsun dedikde, gıbbe’s-suâl ve’l-inkâr müdde‘î-i merkūm Mehmed Çelebi’den müdde‘âsını mütebeyyine beyyine taleb olundukda ityân-ı beyyineden izhâr-ı acz ile istihlâf etmeğin fi’l-vâki‘ eşyâ-i mezkûre semenlerinden altı yüz doksan akçe ve cihet-i deyn-i şer‘îden beş bin sekiz yüz akçe ve menzil ücretinden dahi beş bin akçe ki cem‘an müdde‘î-i mezbûra zimmetinde edâsı lâzım on bir bin dört yüz doksan akçe deyni olmadığına merkūme Sâliha Hâtun’a yemîn teklîf olundukda ol dahi yemîn etmeğin mûcebince müdde‘î-i merkūm Mehmed Çelebi bilâ-beyyine [21a] mu‘ârazadan men olunup mâ vaka‘a bi’t-taleb ketb olundu. Fi’l-yevmi’l-hâmis aşer min Cumâdelûlâ li sene seb‘a ve seb‘în ve elf. Şuhûdü’l-hâl: Abdi Çelebi b. Hüseyin, Şükrullah Bey b. Mustafa, Mehmed b. Ramazan, Resul b. Rıdvan, İbrahim Çelebi b. Ahmed.