Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 205 Hüküm no: 210 Orijinal metin no: [31b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todori v. Yani’nin çayır hissesinin kullanım hakkını Toros v. Yani’ye devretmesi Vilâyet-i Rumeli’nde Yenişehir kazâsı müzâfâtından Fener nâhiyesine tâbi‘ Secüle? nâm karyeden olup Sermenek mahallesi demekle ma‘rûf mahallesi sâkinlerinden Todori v. Yani nâm zimmî meclis-i şer‘-i hatîr-i lâzımü’t-tevkīrde işbu râfi‘ü hâze’l-kitâb Toros v. Yani nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūme sınırında mevâzi‘-i adîdede vâki‘ her biri inde’l-ahâlî ve’l-cîrân hudûdu ma‘lûm üç kıt‘a çayırlardan mutasarrıf olduğum sülüs hisse-i şer‘iyye-i şâyi‘alarımı cümle-i tevâbi‘ ve levâhıkı ve kâffe-i menâfi‘ ve merâfıkları ile mezbûr Toros’a tefvîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîzde olan bin beş yüz nakd-i fıddî-i Osmânî râyic fi’l-vakt akçeyi mezbûr Toros yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân çayırlardan mutasarrıf olduğum sülüs hisse-i şâyi‘alarım mezbûr Toros’undur sâir emsâli tasarrufu gibi keyfe mâ yeşâ mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-mezbûr Toros bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fî selhi Cemâziyelevvel li sene tis‘a ve ışrîn ve elf. Şuhûdü’l-hâl: Ali b. Abdullah, Mustafa b. Mehmed, Yakub b. Kurd, Morafit v. Angilani, Harito v. Dimitri, Yorgi v. Papa Şimo, Sokodoş v. İsteryani, İsteryani v. Apostol, İsteryani v. Rika ve gayruhüm mine’l-hâzırîn.