Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 211 Hüküm no: 220 Orijinal metin no: [33a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şâkire bt. Abdullah’ın Mehmed Beşe b. Abdullah’ı vasî tayin etmesi [Medîne-i Ebâ Eyyûb-i] Ensârî -râdiye anhu Rabbühü’l-Bârî- mahallâtından ( ) mahallesi sâkinelerinden Şâkire bt. Abdullah nâm hâtun meclis-i şer‘-i hatîr-i lâzımü’t-tevkīrde işbu bâ‘isü’l-kitâb Mehmed Beşe b. Abdullah nâm râcil mahzarında bi’t-tav‘ ve’r-rızâ ikrâr ve takrîr-i kelâm edip vesâyâ-yı âtiyemi tenfîze mezbûr Mehmed Beşe’yi vasiyy-i muhtâr nasb ve ta‘yîn eyledim şöyle ki ecel-i mev‘ûd-ı gayr-ı merdûd erişip irâdet-i Rabbânî ile âlem-i fânîden âlem-i bekāya rıhlet eylediğimde bundan akdem hasbeten lillâhi te‘âlâ Belkıs bt. Abdullah nâm câriyemi i‘tâk eylediğimde cemî‘ malımdan ifrâz edip hibe-i sahîha-i şer‘iyye ile hibe eylediğim iki beledî döşek ve iki minder ve iki yemeni yorgan ve sekiz yastık ve bir kaliçe ve bir bakır sini ve iki ferâce ve bir kırmızı atlas zıbın ve bir tâbe ve bir maşraba ve üç yahni tepsisi ve sâir beynimizde cinsi ve nev‘i ilm-i şer‘î birle ma‘lûm cümle-i esâs-ı beytimiz hâlâ mu‘takam olan mezbûre Belkıs’a teslîm eyledim vasiyy-i muhtârım mezbûr Mehmed Beşe dahl ve ta‘arruz eylemeye ve âmme-i muhallefâtımın sülüsünden ifrâz eylediğim bin beş yüz akçeyi intikāl ettiğim günde techîz ve tekfînime ve iskāt-ı salâtım ve tabh-ı ta‘âm ve sâir vücûh-ı hayrâta harc ve sarf eyleye dedikde mezbûr Mehmed Beşe dahi bi’l-muvâcehe vesâyet-i merkūmeyi kabûl ve hizmet-i vesâyeti edâ ve kıyâma müte‘ahhid olıcak mâ hüve’l-vâki‘ gıbbe’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Ahmed Efendi b. ( ) el-İmâm, üstâd Bayram b. Abdullah, el-Hâc Ali b. Abdullah, Perviz b. Abdullah, Mustafa b. Mehmed el-Müezzin, Süleyman b. Turgud, Yakub. Kurd ve gayruhüm mine’l-hâzırîn.