Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 215 Hüküm no: 226 Orijinal metin no: [33b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ergiri v. Yani’nin menzili ile ceviz ağaçlarını Yorgi v. Yani’ye satması Vilâyet-i Rumeli’nde İnebahtı sancağında Gerbeniş kazâsına tâbi‘ Anderanova nâm karye sâkinlerinden Ergiri v. Yani nâm [zimmî] meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Yorgi v. Yani nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Yorgi v. Dimo mülküne ve bir tarafdan Dimo v. Kondilo mülküne ve bir tarafdan Yani v. Papa mülküne ve bir tarafdan Nikola v. Koçi mülküne müntehî ve mahdûd bir tahtânî beyti ve zât-ı eşcâr-ı müsmire ve gayr-ı müsmireyi hâvî cüneyneyi müştemil mülk menzilimi ve yine menzil-i mezbûr kurbunda vâki‘ dört dip mülk ceviz ağacı, cümle-i tevâbi‘ ve levâhıkı ve kâffe-i menâfi‘ ve merâfıkı ile bi safkatin vâhidetin üç bin yüz nakd-i fıddî-i Osmânî râyic fi’l-vakt akçeye mezbûr Yorgi’ye bey‘-i bâtt-ı sahîh-i şer‘î ile bey‘ ve kabz-ı semen edip mebî‘ât-ı mahdûde-i mezkûrâtı mahallinde kabza müşterî-i mezbûru taslît eyledim ba‘de’l-yevm sâlifü’l-beyân menzil-i mahdûd ve dört dip ceviz ağacı mezbûr Yorgi’nin mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Yorgi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Abacı Yo[r]gi, Yorgi v. Dimo, Yani v. Nikola, Andriye v. Dimo, Dimo v. İstati, Vasil v. Nikola, Laston v. Dimo ve gayruhüm.