Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 216 Hüküm no: 227 Orijinal metin no: [34a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mülâyim bt. Abdullah’ın menzilini Şaban b. Abdullah’a satması Havâss-ı Aliyye kazâsı müzâfâtından Terkos nâhiyesine tâbi‘ Akpınar nâm karye sâkinelerinden Mülâyim bt. Abdullah nâm hâtun meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Şaban b. Abdullah nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Hüseyin b. Abdullah mülküne ve bir tarafdan Şaban b. ( ) mülküne ve bir tarafdan Mehmed Çelebi b. Musli mülküne ve bir tarafdan tarîk-i âma müntehî ve mahdûd bir tahtânî beyti ve bir ahırı ve eşcâr-ı müsmireyi hâvî cüneyneyi müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile merkūm Şaban’a iki bin üç yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd kıldım ba‘de’l-yevm sâlifü’l-beyân menzil-i mahdûd merkūm Şaban’ın mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırra-i mezbûrenin vech-i mübeyyen üzre cârî olan ikrâr ve takrîrin el-mukarru lehü’l-mezbûr Şaban bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ min Cemâziyelevvel li târihi’l-mezbûr. Şuhûdü’l-hâl: Rüstem Beşe b. Abdullah er-Râcil, Ali b. Nasuh, Perviz b. Abdullah, Kaya b. Mehmed, Hızır b. Abdullah, Receb b. Mustafa, Musli b. ( ) er-Râcil, Süleyman b. Turgud, Ali b. Abdullah, Perviz [b.] Abdullah ve gayruhüm mine’l-hâzırîn.