Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 229 Hüküm no: 247 Orijinal metin no: [37a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs bt. Ali ile Aynî bt. Mustafa’nın menzil hisselerini Memi b. Dursun’a satmaları Mahmiye-i Kostantıniyye -humiyet ani’l-âfât ve’l-beliyye- de Saraçhâne kurbunda vâki‘ ( ) mahallesi sâkinelerinden Belkıs Hâtun bt. Ali ve medîne-i Hazret-i Ebâ Eyyûb-i Ensârî -râdiye anhu Rabbühü’l-Bârî- mahallâtından Zal Mahmud Paşa mahallesi sâkinelerinden Aynî bt. Mustafa nâm hâtunlar meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Memi b. Dursun nâm kimesne mahzarında her biri bi’t-tav‘ ve’r-rızâ ikrâr ve takrîr-i kelâm edip medîne-i merkūme müzâfâtından Terkos nâhiyesine tâbi‘ Çiftalan nâm karyede vâki‘ bir tarafdan tarîk-i âm ve üç tarafdan yine müşterî-i mezbûr mezra‘alarına müntehî ve mahdûd bir tahtânî beyti ve zât-ı eşcâr-ı müsmire ve gayr-ı müsmireyi hâvî cüneyneyi müştemil olan mülk menzilden hisse-i şâyi‘alarımızı merkūm Memi’ye dört bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip meblağ-ı merkūm dört bin akçeyi merkūm Memi yedinden ale’l-iştirâk ahz ve kabz edip teslîm-i mebî‘ eyledik ba‘de’l-yevm sâlifü’l-beyân menzilden hisse-i şâyi‘alarımız merkūm Memi’nin mülk-i müşterâ-yı sarîhidir keyfe mâ yeşâ ve yahtâr mutasarrıf olsun dediklerinde mukırretân-ı mezbûretânın minvâl-i muharrer üzre cârî olan ikrâr ve takrîrlerini el-mukarru lehü’l-mezbûr Memi vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis min Cumâdelâhire li târihi’l-mezbûr. Şuhûdü’l-hâl: Hasan Efendi b. Nasuh el-İmâm, Receb Efendi b. ( ), İbrahim Bey b. Abdullah el-Bevvâbü’s-sultânî, Yunus Bey b. ( ), Mustafa b. Mehmed, Süleyman b. Turgud, Yakub b. Kurd, Ali b. Abdullah, Perviz b. Abdullah.