Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 229 Hüküm no: 248 Orijinal metin no: [37a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hristo v. Horyanor’un bağını İstefano v. Yorgi’ye satması Havâss-ı Aliyye kazâsı müzâfâtından kasaba-i Çatalca mahallâtından Papa Andriye mahallesi sâkinlerinden Hristo v. Horyanor nâm zimmî meclis-i şer‘de işbu hâmil-i hâze’l-kitâb İstefano v. Yorgi nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip kasaba-i merkūme bağları dâhilinde vâki‘ bir tarafdan Yani v. Solo bağına ve bir tarafdan Kosta v. Sosodoş bağına ve bir tarafdan Preşkova bağına müntehî ve mahdûd tahmînen yirmi çapalık bir kıt‘a mülk bağımı cümle-i tevâbi‘ ve levâhıkı ile merkūm İstefano’ya yedi bin nakid akçeye bey‘-i bât ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm sâlifü’l-beyân bir kıt‘a bağ-ı merkūm İstefano’nun mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun ikrârını el-mukarru lehü’l-mezbûr İstefano vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fî evâsıtı Cumâdelâhire li târihi’l-mezbûr. Şuhûdü’l-hâl: Mehmed b. Abdullah er-Râcil, Hüseyin b. Abdullah er-Râcil, Mehmed b. Abdullah er-Râcil, Dimitri v. Yani, Yorgi v. Yani, Dimitri [b.] Yani, Mihal [b.] Dimitri, İstemad v. Dimitri ve gayruhüm.