Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 230 Hüküm no: 249 Orijinal metin no: [37a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgo v. Mihal’in menzil ve bağını Dimitri v. Yani’ye satması (bey‘ bi’l-vefâ) Vilâyet-i Rumeli’nde İnebahtı sancağında Yenişehir kazâsı müzâfâtından Kûhistan nâhiyesine tâbi‘ Büyük Kerasova nâm karye sâkinlerinden Yorgo v. Mihal nâm zimmî meclis-i şer‘-i şerîfde işbu hâmil-i hâze’l-kitâb Dimitri v. Yani nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i mezbûrede vâki‘ bir tarafdan Todori v. İstemad mülküne ve bir tarafdan İstani v. ( ) mülküne ve bir tarafdan Dimitri v. İstertor mülküne ve bir tarafdan tarîk-i âma müntehî olan mülk menzilimi ve yine karye-i mezbûre bağları dâhilinde vâki‘ bir tarafdan Anastas v. Dimitri bağına ve bir tarafdan Yorgo v. Dimitri tarlasına ve bir tarafdan Todori v. Yorgi bağına ve bir tarafdan tarîk-i âma müntehî olup bir kıt‘a mülk bağımı târih-i kitâbdan bir sene tamâmına dek mezbûr Dimitri’ye bi safkatin vâhidetin on iki bin nakd-i fıddî-i Osmânî râyic fi’l-vakt akçeye bey‘ bi’l-vefâ tarîki üzre bey‘ edip ol dahi iştirâ ve kabz ettikden sonra semen-i mezbûru müşterî-i merkūm yedinden bi’t-tamâm ve’l-kemâl ahz ve kabz eyledim dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Dimitri vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olunup yed-i tâlibine def‘ ve vaz‘ olundu. Hurrire fi’l-yevmi’r-râbi‘ aşer min şehri Cumâdelâhire li sene tis‘a ve ışrîn ba‘de’l-elf. Şuhûdü’l-hâl: İskarlet v. Yani, Nikola v. Dimitri, Şilo v. Nikola, Anastas v. Yorgo, Nikola v. Dimitri, Şilo v. Dimitri ve gayruhüm mine’l-hâzırîn.