Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 230 Hüküm no: 250 Orijinal metin no: [37b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hamza b. Maden’in menzilini oğlu Ahmed’e satması Medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Zeyneb Hâtun mahallesi sâkinlerinden Hamza b. Maden meclis-i şer‘-i şerîfde işbu hâmil-i hâze’l-kitâb sulbî kebîr oğlu Ahmed b. Hamza mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrda vâki‘ bir tarafdan Süleyman b. Abdullah mülküne ve bir tarafdan Hızır Beşe b. Abdullah mülküne ve bir tarafdan Debbâğ Mehmed mülküne ve bir tarafdan tarîk-i âma müntehî ve mahdûd olup işbu akdin sudûruna dek silk-i mülk-i sahîhimde münselik ve münharıt olup iki tahtânî ve üç fevkānî beyti ve kenîfi ve üç bi’r-i mâyı ve zât-ı eşcâr-ı müsmire ve gayr-ı müsmireyi müştemil cüneyneyi hâvî mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Ahmed’e yirmi bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip ba‘de’l-yevm sâlifü’l-beyân hudûd ile mahdûd olan menzil-i merkūm Ahmed’in mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrin el-mukarru lehü’l-mezbûr Ahmed bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olunup yed-i tâlibine def‘ olundu. Hurrire fi’l-yevmi’r-râbi‘ aşer min şehri Cumâdelâhire li sene tis‘a ve ışrîn ba‘de’l-elf. Şuhûdü’l-hâl: Mustafa el-İmâm, el-Hâc İsmail b. Mehmed el-Müezzin, Hasan b. Sinan, Ahmed b. Hamza, Yusuf b. Cafer, Osman b. Behram, Ali b. Hasan ve gayruhüm.