Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 236 Hüküm no: 259 Orijinal metin no: [38b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pavlo v. Hristo’nun Dimo v. Nikola’dan alacağını tahsil etmesi Vilâyet-i Rumeli’nde Bergos kazâsına tâbi‘ Alıpulu nâm karyeden Pavlo v. Hristo nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Dimo v. Nikola nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip bundan akdem mezbûr Dimo zimmetinde koyun bahâsından on dört bin beş yüz altmış akçe hakkım olup hâlâ meblağ-ı mersûm mukābelesinde beher re’si yüz kırk beşer akçe hesâbı üzre merkūm Dimo yedinden yüz re’s koyun ahz ve kabz eyledim ba‘de’l-yevm mezbûr Dimo zimmetinde bir akçe ve bir habbe bâkī kalmadı dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Dimo vicâhen tasdîk ve şifâhen tahkīk edicek mâ hüve’l-vâki‘ gıbbe’t-taleb ketb olundu. Hurrire fî evâsıtı Cumâdelâhire li sene tis‘a ve ışrîn ve elf. Şuhûdü’l-hâl: Musa b. A[h]med el-Hatîb, Rıdvan Halîfe b. Abdullah el-Hatîb, Mustafa Halîfe b. Seydî el-İmâm, Mehmed Kethüdâ b. Yusuf er-Râcil, Murad Beşe b. Abdullah er-Râcil, Mehmed Çelebi b. Ali el-Cündî Mehmed Çelebi b. Mehmed, Ahmed Halîfe b. Mehmed el-Müezzin ve gayruhüm mine’l-hâzırîn. Cerâ mâ fîh indî Harrerehû el-fakīr ileyh sübhânehû Rıdvan b. Mehmed el-müvellâ-hilâfeten bi Çekmece es-Suğrâ