Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 236 Hüküm no: 260 Orijinal metin no: [38b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Kaya Vakfı’na ait mumcu dükkânının bir kısmının Polizoyi v. İstati’ye kiralanması Mahmiye-i Kostantıniyye -humiyet ani’l-âfât ve’l-beliyye- hısnı ebvâbından Yenikapı hâricinden merhûm İlyaszâde mahallesi sükkânından Sâkine bt. el-Hâc Kaya nâm hâtun ve Bayram b. Kaya ve İsmail b. Mustafa nâm kimesne meclis-i şer‘de işbu râfi‘ü’l-kitâb Polizoyi v. İstati nâm zimmî mahzarında her biri takrîr-i kelâm edip merhûm-ı mezbûr el-Hâc Kaya’nın vakfından olup selhâne kurbunda vâki‘ iki tarafdan Pervâne Çavuş mülküne ve bir tarafdan tarîk-i hâssa ve bir tarafdan tarîk-i âma müntehî evlâdına meşrût olan vakıf mumcu dükkânının selâse-i erbâ‘ını evlâd-ı vâkıfdan olduğumuz cihetden mezbûr Polizoyi’ye üç bin akçe icâre-i mu‘accele beher mâh doksan akçe ücret-i müeccele ile cemî‘ meremmâtı kendi malından olmak üzre îcâr edip ol dahi minvâl-i muharrer üzre istîcâr ve kabûl eyledi dediklerinde mukırrûn-ı mezbûrûnun vech-i mübeyyen üzre cârî olan ikrâr ve takrîrlerini el-mukarru lehü’l-mezbûr Polizoyi vicâhen ve şifâhen tasdîk ve tahkīk edicek mâ hüve’l-vâki‘ gıbbe’t-taleb ketb olundu. Hurrire li târihi’l-mezbûr. Şuhûdü’l-hâl: Sefer Bey b. ( ) el-Cündî Mehmed Çelebi b. Pervâne el-Müezzin, Receb Halîfe b. ( ) el-Müezzin, İbrahim Beşe b. Abdullah er-Râcil, Mustafa b. Mehmed, Ali b. Abdullah, Yakub b. Kurd, Perviz b. Abdullah ve gayruhüm.