Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 237 Hüküm no: 261 Orijinal metin no: [39a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sitti bt. Ömer’in mehir hususunda üvey kızı Ümmügülsüm bt. Seyyid Mehmed ile sulh olması [Medîne-i Ebâ] Eyyûb el-Ensârî -râdiye anhu Rabbühü’l-Bârî- mahallâtından Defterdâr Mahmud Efendi mahallesinde sâkin [olup] bundan akdem vefât eden es-Seyyid Mehmed’in verâseti, sulbiye kebîre kızı Ümmügülsüm ile zevce-i metrûkesi Sitti Hâtun bt. Ömer’e münhasıra oldukdan sonra mezbûre Sitti Hâtun tarafından husûs-ı âti’z-zikre vekîl olup nehc-i şer‘î üzre vekâleti sâbite olan fahrü’l-akrân Mehmed Beşe b. Abdullah nâm râcil meclis-i şer‘-i mutahharda, müteveffâ-yı mezbûrun cümle muhallefâtına vâzı‘atü’l-yed olan hâfızatü hâze’l-kitâb mezbûre Ümmügülsüm tarafından husûs-ı âti’l-beyâna vekîl olup bimâ hüve tarîkü’s-sübût şer‘an vekâleti sâbite olan zevci Mustafa Beşe b. Rüstem nâm râcil mahzarında vekâleten takrîr-i kelâm edip müteveffâ-yı mezbûrun zimmetinde müvekkilem mezbûrenin mehr-i müeccelinden sekiz bin akçe hakkı olup meblağ-ı mezbûru taleb eyledikde mâbeynlerinde münâza‘a vâkı‘a olmuşidi el-hâletü hâzihî meblağ-ı mezbûru altı bin akçe üzre müvekkilem mezbûreyi muslihûn tavassutuyla sulh edip ol dahi sulh-i mezbûru kabûl ve bedel-i sulh olan meblağ-ı mezbûru bi’t-tamâm yedinden ahz ve kabz edip husûs-ı mezbûra müte‘allik da‘vâdan zimmetini ibrâ-i âm ile ibrâ ve iskāt eyledi ba‘de’l-yevm mazmûn-ı kitâba muhâlif da‘vâ sâdıra olursa lede’l-hükkâmi’l-kirâm mesmû‘a ve makbûle olmasın dedikde vekîl-i mezbûrun ikrârın mezkûr Mustafa Beşe bi’l-vekâle vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis min şehri Cumâdelâhire li sene tis‘a ve ışrîn ve elf. Şuhûdü’l-hâl: Ahmed Efendi el-Müderris, Hasan Efendi el-Müsta‘id, Hüseyin Halîfe el-Müezzin, Veli Halîfe el-Müezzin.