Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 238 Hüküm no: 262 Orijinal metin no: [39a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rizo v. Yani’nin bağını Harito v. Zağrab’a satması Vilâyet-i Rumeli’nde İnebahtı sancağında Yenişehir kazâsı müzâfâtından Fener nâhiyesine tâbi‘ Zelob nâm karye sâkinlerinden Rizo v. Yani nâm zimmî meclis-i şer‘-i şerîfde işbu hâmil-i hâze’l-kitâb Harito v. Zağrab nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i mezbûre bağları dâhilinde vâki‘ bir tarafdan İsteryanos v. Dimo bağına ve bir tarafdan Şimo v. Andriye bağına ve bir tarafdan Yani v. İstemad bağına ve bir tarafdan Mariya nâm nasrâniye bağına müntehî eşcâr-ı müsmire ve gayr-ı müsmireyi müştemil tahmînen beş dönüm bir kıt‘a mülk bağımı mezbûr Harito’ya beş bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘ât-ı mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân hudûd ile mahdûd olan bağ-ı mezbûr Harito’nun mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrin el-mukarru lehü’l-merkūm Harito vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu yed-i tâlibine def‘ olundu. Hurrire fi’l-yevmi’s-sâbi‘ min şehri Cumâdelâhire li sene tis‘a ve ışrîn ve elf. Şuhûdü’l-hâl: Dimo v. Yorgi, Dimo v. Apostol, Koni v. Siro, Todori v. ( ) kuyumcu, Niko v. ( ) kuyumcu, Dimo v. ( ) kuyumcu, Yani v. ( ) kuyumcu, Harito v. Pavlo, Todori v. Panayot.