Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 238 Hüküm no: 263 Orijinal metin no: [39a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Abdullah’ın bakkal dükkânının dörtte bir hissesini Nikola v. Dimitri’ye satması Medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Kasımpaşa mahallesi sâkinlerinden Mustafa b. Abdullah meclis-i şer‘-i şerîf-i lâzımü’t-tevkīrde işbu hâmil-i hâze’l-kitâb Nikola v. Dimitri nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip medîne-i mezbûrede Çömlekçiler çarşısında vâki‘ merkūm Kasım Paşa vakfı’ndan olup bir tarafdan bostana ve bir tarafdan yine vakf-ı mezbûra ve iki tarafdan tarîk-i âma müntehî ve mahdûd olup icâre-i mu‘accele ve beher şehr on iki buçuk akçe icâre-i müeccele ile taht-ı tasarrufumda olan arz üzerinde mebnî bir bakkal dükkânımdan rub‘ hisse-i şâyi‘amı dâhilinde olan âlât ve eşyâ ile cümletü’t-tevâbi‘ ve levâhıkı [ile] mezbûr Nikola’ya bin nakd-i fıddî-i râyic fi’l-vakt akçeye bey‘-i sahîh-i şer‘î [ile] bey‘ edip kabz-ı semen-i ma[‘dûd] ve teslîm-i mebî‘-i mahdûd eyledim dedikde ba‘de’l-yevm zikr olunan hisse-i şâyi‘ası Nikola’nın mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-merkūm Nikola vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olunup yed-i tâlibine def‘ olundu. Hurrire fi’l-yevmi’s-sâbi‘ min Cumâdelâhire li sene tis‘a ve ışrîn ve elf. Şuhûdü’l-hâl: Fahrü’l-eşbâh Ali Ağa b. Abdülmennân, Kābil b. Abdullah, Mehmed Beşe ( ) er-Râcil, Mustafa b. Mehmed, Yakub b. Kurd, Süleyman b. Turgud.