Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 239 Hüküm no: 264 Orijinal metin no: [39b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Davud Çavuş b. Cafer’in kiremitlik fırınındaki yarım hissesini Osman Beşe b. Abdullah’a devretmesi Osman Beşe’nin kiremid fırınının hüccetidir. Mahmiye-i Kostantıniyye -humiyet ani’l-âfât ve’l-beliyye- mahallâtından Sultan Bayezid Hân mahallesi sükkânından fahrü’l-emâsil ve’l-ekârim Davud Çavuş b. Cafer meclis-i şer‘-i hatîr-i lâzımü’t-tevkīrde işbu bâ‘isü’l-kitâb fahrü’l-cüyûş ve’l-cünûd Osman Beşe b. Abdullah nâm râcil mahzarında bi’t-tav‘ ve’r-rızâ ikrâr ve takrîr-i kelâm edip Havâss-ı Aliyye kazâsı tevâbi‘inden Pîrî Paşa mahallâtından Turşucuzâde mahallesinde vâki‘ sâhibü’l-hayr ve’l-hasenât merhûm el-Hâc Mustafa Paşa vakfı’ndan olup bir tarafdan Turşucuzâde tekyesine ve bir tarafdan Ahmed Çelebi vakfı’na ve bir tarafdan Mustafa Paşa vakfı’na ve bir tarafdan deryâya müntehî mahdûd dört bâb fevkānî ve tahtânî odaları ve altı aded harmanı ve mahzeni müştemil olup icâre-i mu‘accele ve beher sene cânib-i vakf-ı mezbûra yedi bin akçe ücret-i müeccelesi olan kiremidlik fırınından mutasarrıf olduğum nısf hisse-i şâyi‘amın hakk-ı tasarrufu vakf-ı mezbûr mütevellîsi ma‘rifetiyle müşârün-ileyh Osman Beşe’ye tefvîz edip ol dahi minvâl-i muharrer üzre tefevvüz ve kabûl eyledikden sonra mukābele-i tefvîzde olan yüz altmış bin nakd-i fıddî-i Osmânî râyic fi’l-vakt akçeyi bi’t-tamâm ve’l-kemâl müşârün-ileyh Osman Beşe yedinden ahz ve kabz eyledim ba‘de’l-yevm sâlifü’l-beyân hudûd ile mahdûd olan kiremidlik fırınından nısf hisse-i şâyi‘amın hakk-ı tasarrufu merkūm Ahmed Beşe’nindir sâir emsâli tasarrufu gibi keyfe mâ yeşâ ve yahtâr mutasarrıf olsun dedikde mukırr-ı mezbûrun ikrârını el-mukarru lehü’l-mezbûr Osman Beşe tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-hâdî aşer li târihi’l-mezbûr Şuhûdü’l-hâl: Fahrü’l-küttâb Ömer Çelebi b. el-Hâc İlyas, Mehmed Efendi b. Abdünnebi el-Hatîb, Mustafa Halîfe b. Hasan el-İmâm, İbrahim Halîfe b. Kasım el-İmâm, Mehmed Halîfe b. Eyüb el-Müezzi[n], Eyüb Halîfe b. Ali el-Müezzin, Mehmed Halîfe b. Rüşdü el-Müezzin, Şeyh Mehmed Efendi b. İbrahim, Ahmed Bey b. ( ) el-Bevvâbü’s-sultânî, Hâce Habib b. Mehmed, Mehmed b. Yusuf, Mustafa Çelebi b. Mehmed er-Râcil, Mehmed Beşe b. İbrahim, Mustafa b. Abdullah, Mustafa Bey b. Mehmed el-Cündî Mustafa Bey b. İsmail, Hüseyin Çelebi b. Hasan el-Cündî ve gayruhüm.