Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 240 Hüküm no: 265 Orijinal metin no: [39b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Dimitri’nin tarlalarının kullanım hakkını Angilani v. İstemad’a devretmesi Rumeli’nde İnebahtı sancağında Yenişehir kazâsı müzâfâtından Fener nâhiyesine tâbi‘ Büyük Kerasova nâm karyeden Yorgi v. Dimitri nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-kitâb Angilani v. İstemad nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūme kurbundan birisi eski kiliseye karîb ve birisi Soğukçeşme’ye karîb ve birisi Maskalyoz nâm zimmî tarlası kurbunda ve bir kıt‘a dahi İkiharman demekle ma‘rûf mevzi‘de vâki‘ tahmînen cümlesi diyârımız keyli ile mu‘ayyen iki yük tohum istî‘âb eder dört kıt‘a mutassarıf olduğum tarlaların hakk-ı tasarrufunu sâhib-i arz ma‘rifetiyle mezbûr Angilani’ye tefvîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîzde olan on bir bin beş yüz nakd-i fıddî-i Osmânî râyic fi’l-vakt akçeye mezbûr Angilani yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân mevzi‘lerde vâki‘ dört kıt‘a tarlaların hakk-ı tasarrufları mersûmundur sâir emsâli tasarrufu gibi keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-mezbûr Aneklasi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-hâdî aşer min Cumâdelâhire li sene tis‘a ve ışrîn ve elf. Şuhûdü’l-hâl: Mustafa b. Mehmed, Ali b. Abdullah, Yakub b. Kurd, İsteryano [v.] Sarot, İstemad v. Papa, Maskalyo [v.] Vasil, Arbiro v. Hristo, Todori v. Permidi, Mihal [v.] Kirici, Mihal [v.] Todori, Paroş [v.] Yorgi, Yorgi v. Rizo ve gayruhüm mine’l-hâzırîn.